ནང་འཁོད་ཀྱི་སྐུདཔ་བཙོང་མི་དང་ཉོ་མི་ཚུ་གི་བར་ན་ མཉམ་འབྲེལ་འབད་ཐབས་ཀྱི་ཞལ་འཛོམས།

སྤྱི་ཟླ་༩ པའི་ཚེས་ ༢༧ ༢༠༡༩

༉ རྒྱལ་ཁབ་ནང་ལུ་ ནང་འཁོད་ཀྱི་སྐུདཔ་བཏོན་ནི་གི་འོས་འབབ་ སྦོམ་སྦེ་ཡོད་རུང་ ཐོན་སྐྱེད་བཙོང་མི་དང་ ཉོ་མི་ཚུ་གི་བར་ན་ མཉམ་འབྲེལ་ལེགས་ཤོམ་མེད་ནི་འདི་གི་ ཐོན་སྐྱེད་ཚུ་ རེ་བ་སྐྱེད་དོ་བཟུམ་ཅིག་རང་ བཏོན་མ་ཚུགས་པར་འདུག

གནད་དོན་འདི་ སེལ་ནི་གི་དོན་ལུ་ ད་རིས་ལས་འགོ་བཙུགས་ཏེ་ ཐིམ་ཕུག་ལུ་སྦེ་ ཉིནམ་༢་ཀྱི་ ཚོང་འབྲེལ་གྱི་ཞལ་འཛོམས་ཅིག་ འགོ་བཙུགས་ཏེ་ཡོདཔ་ཨིན།

ཞལ་འཛོམས་འདི་ནང་ལུ་ ས་ཐག་རིང་སར་ སག་སྟེང་ལས་ཡང་ སྐུདཔ་བཙོང་མི་ཚུ་གིས་ ཐིམ་ཕུག་ལུ་ སྐུདཔ་ཉོ་མི་ཚུ་དང་གཅིག་ཁར་ འབྲེལ་བ་བཟོ་ནི་སྦེ་ འོང་སྟེ་ཡོདཔ་ཨིན་མས།

ཁོང་ཆ་ཁྱབ་ཀྱིས་སླབ་མི་ནང་ ད་ལྟོ་ཚུན་ཚོད་ སྐུདཔ་ཚུ་ཡང་ རང་གི་ལག་ལེན་གྱི་དོན་ལུ་རྐྱངམ་ཅིག་ བཟོ་ཡོདཔ་མ་གཏོགས་ ཚོང་འབྲེལ་གྱི་དོན་ལུ་ མནོ་བསམ་རང་མ་བཏང་པས་ཟེར་བཤད་ཅི།

འདི་ཡང་ ཁོང་ཆ་ཁྱབ་ཀྱིས་ ནང་འཁོད་ལས་འཐོན་པའི་སྐུདཔ་ཚུ་ ཁྲོམ་ཁ་ལས་ཕར་ མཁོ་འདོད་སྦོམ་སྦེ་ སྐྱེད་དེ་ཡོད་པའི་སྐོར་ལས་ ཧ་མ་གོ་བར་ཡོད་མི་ལུ་བརྟེན་ཏེ་ཨིན་མས།

འདི་བཟུམ་སྦེ་ སྐུདཔ་ཉོ་མི་མང་ཤོས་ཅིག་གིས་རང་ མཁོ་འདོད་སྐྱེད་མི་ཚུ་ གྲུབ་ནི་གི་དོན་ལས་ སྐུདཔ་ཚུ་ ནང་འདྲེན་འཐབ་དོ་ཡོདཔ་ཨིན་མས།

ཞ་ལ་འཛོམས་དེ་ལས་བརྟེན་ཏེ་ ད་ལས་ཕར་ སྐུདཔ་ཉོ་མི་དང་བཙོང་མི་ཚུ་གི་བར་ན་ ཚུལ་མཐུན་གྱི་སྒོ་ལས་ ཚོང་འབྲེལ་འཐབ་ཚུགས་པའི་ རེ་བ་སྐྱེདཔ་ཨིན་མས།

འདི་གིས་སྦེ་ ནང་འཁོད་ལས་འཐོན་པའི་ སྐུདཔ་ཚུ་གི་གོང་ཚད་དང་ སྤུས་ཚད་དང་འབྲེལ་བའི་ གནད་དོན་ཚུ་ཡང་ སེལ་ཚུགས་ནི་ཨིན་མས།

རྒྱལ་ཁབ་ནང་ལུ་ ནང་འཁོད་ཀྱི་སྐུདཔ་ཚུ་ རྒྱ་སྦོམ་སྦེ་བཏོན་ཚུགས་པའི་ འོས་འབབ་ཡོདཔ་སྦེ་མཐོང་མི་དང་འབྲེལ་ འབྲུག་བཟོ་ཡར་སྐྱེད་ལས་ཚབ་ཀྱིས་ ནང་འཁོད་ཀྱི་སྐུདཔ་བཟོ་མི་ཚུ་ལུ་ ཐོན་སྐྱེད་མང་སུ་ཅིག་སྦེ་བཏོན་དགོ་པའི་ སེམས་ཤུགས་བྱིན་དོ་ཡོདཔ་སྦེ་བཤད་ཅི།

གན་དོན་འདི་བརྟེན་ཏེ་ ནང་འཁོད་ཀྱི་སྐུདཔ་ལས་བརྟེན་པའི་ཐོན་སྐྱེད་ཚུ་ ཚོང་འབྲེལ་འཐབ་མ་ཚུགས་པའི་གདོང་ལེན་བྱུང་སྟེ་ཡོད་མི་འདི་ སེལ་ཚུགས་ནི་ཨིནམ་མ་ཚད་ ཟྭོ་ཆག་དང་ ལུག་གི་སྦལ་ དེ་ལས་ ཀ་སྦལ་ལས་བཟོ་སྲོལ་ཡོད་པའི་ རང་ལུགས་ཀྱི་སྐུདཔ་ཚུ་ ཉམས་སྲུང་འབད་ནི་ནང་ལུ་ཡང་ ལྷན་ཐབས་འབྱུང་ནི་ཨིན་མས།

ཞལ་འཛོམས་འདི་ཡང་ ཨི་རོབ་པཱི་ཡན་ཡུ་ནི་འཎ་གིས་རྒྱབ་སྐྱོར་འབད་དེ་ འབྲུག་བཟོ་ཡར་སྐྱེད་ལས་ཚབ་ཀྱིས་ འགོ་འདྲེན་འཐབ་དོ་ཡོདཔ་ཨིན་མས།