༉ ཧེ་མ་འབད་བ་ཅིན་ ཕུན་ཚོགས་གླིང་གི་ཁྲོམ་འདི་ གནམ་དགུན་ མི་ལེ་ཤ་སྦེ་འཛོམས་སའི་ ཁྲོམ་ཅིག་ཨིན་རུང་ ད་རེས་ནངས་པ་ རྟ་འདི་ཚུ་འཁྱམས་སའི་ ས་གོ་ཅིག་ལུ་འགྱུར་ཏེ་སྦེ་འདུག།
མི་ཚུ་གིས་སླབ་མི་ནང་ ནད་ཡམས་ཀྱི་གནས་སྟངས་ནང་ འཕྲལ་འཕྲལ་ར་ འགྲོ་འགྲུལ་བཀག་དམ་འབད་ནི་འདི་གིས་ མི་མང་ཤོས་ཅིག་ར་ རྫོང་ཁག་གཞན་ཁ་ལས་ཕར་འགྱོ་བའི་ཤུལ་མ་ རྟ་འདི་ཚུ་ འོང་ནི་འགོ་བཙུགས་ཅི་ཟེར་ཨིན་མས།
འདི་ཡང་ ཨ་རྟག་འབད་བ་ཅིན་ གནམ་དགུན་ རྒྱལ་ཁབ་ཀྱི་ས་གནས་ཐདམ་ཐད་ཁ་ལས་ མི་ཚུ་ ཕུན་ཚོགས་གླིང་ཁྲོམ་ཁར་འཛོམས་དོ་ཡོདཔ་ཨིན་རུང་ ད་རེས་འབདཝ་ད་ མི་མེན་པར་ སྦོ་ལོགས་ཁ་གི་ས་གནས་ཚུ་ནང་ལས་ རྟ་༢༠དེ་ཅིག་ ཁྲོམ་ཁ་ལུ་འཁྱམས་སྡོད་དོ་ཡོདཔ་ཨིན་མས།
རྟ་འདི་ཚུ་ཡང་ གླིང་ལྡན་གཡུས་ཚན་དང་ ཉེས་འདབས་ལུ་པའི་ གཡུས་མཚན་ཚུ་ནང་གི་ཨིན་མས།
འདི་ལུ་ ཁྲོམ་ཁར་སྡོད་མི་ཚུ་གིས་སླབ་མི་ནང་ སློབ་གྲྭ་ནང་འགྱོ་མི་ ཁོང་གི་ཨ་ལོ་ཚུ་ལུ་ རྟ་ཚུ་གིས་རྡོག་ཐེ་རེ་རྐྱབ་པ་ཅིན་ ཉེན་ཁ་འདུག་ཟེར་བཤད་ཅི།
འདི་མ་ཚད་ ཁོང་ཆ་ཁྱབ་ཀྱིས་སླབ་མི་ནང་ རྟ་ཚུ་གིས་ ཁྱིམ་གྱི་གདོང་ཁར་ ཆུ་བཟེད་དེ་བཞག་མི་ཚུ་ཡང་ འཐུང་དོ་ཡོད་པའི་ཁར་ ཕྱགས་སྙིགས་ཚུ་ཡང་ སློང་དོ་ཡོདཔ་ལས་ ས་ཁོ་ཁམས་ལོག་སི་སི་སྦེ་ བཟོཝ་མས་ཟེར་ཨིན་མས།
འདི་དང་གཅིག་ཁར་ ཁྲོམ་སྡེ་ཡིག་ཚང་ལུ་ཡང་ རྟ་འདི་ཚུ་ འཛིན་སྐྱོང་འཐབ་ནི་འདི་ གདོང་ལེན་ཅན་ཅིག་སྦེ་འཐོན་ཏེ་འདུག
འདི་ཡང་ ཧེ་མ་ཚར་ཅིག་ ཁྲོམ་སྡེ་གིས་ རྟ་འདི་ཚུ་ བདག་འཛིན་འཐབ་སྟེ་བཞག་ཡོདཔ་ཨིན་རུང་ བདག་འཛིན་འཐབ་ནི་འདི་ ལཱ་ཁག་ཡོད་པའི་ཁར་ རྟའི་ཆགས་ཉོ་ནི་འདི་ཡང་ ཟད་འགྲོ་ལྕི་བས་ཟེར་བཤད་ཅི།
ད་ལྟོ་ཚུན་ཚོད་ སྟབས་མ་བདེཝ་སྦོམ་ཅིག་ ག་ནི་ཡང་མ་འཐོན་པར་ཡོད་རུང་ མི་ཚུ་གིས་འབད་བ་ཅིན་ མ་ཕྱིཔ་ཅིག་ལས་ ཐབས་ཤེས་ཅིག་བཏོན་པ་ཅིན་ ལེགས་ཤོམ་འོང་ནི་མས་ཟེར་ཨིན་མས།
བསོད་ནམས་དཔལ་འབྱོར། གནས་ཚུལ་བསྡུ་ལེན། ཆུ་ཁ།