༉ དྲག་ཤོས་ཤེས་རབ་རྒྱལ་མཚན་གྱིས་ ནང་སྲིད་བློན་པོའི་གོ་གནས་དང་ སྤྱི་ཚོགས་ཀྱི་འཐུས་མི་ལས་ དགོངས་ཞུ་འབད་དེ་ཡོདཔ་ཨིན།
དྲག་ཤོས་ཀྱིས་ཕུལ་མི་ དགོངས་ཞུའི་ཞུ་ཡིག་འདི་ ཁ་ཙ་དྲོ་པ་ བློན་ཆེན་དང་ རྒྱལ་ཡོངས་ཚོགས་འདུའི་ཚོགས་དཔོན་གྱིས་ ཆ་འཇོག་གནང་ཡི།
བློན་ཆེན་ཡིག་ཚང་གིས་བཀོད་མི་ནང་ དྲག་ཤོས་ ཤེས་རབ་རྒྱལ་མཚན་གྱིས་ ཁ་ཙ་དྲོ་པ་ བློན་ཆེན་གྱི་སྐུ་འདུན་ལུ་བཅར་ཞིནམ་ལས་ བློན་པོའི་གོ་གནས་ལས་ དགོངས་ཞུ་འབད་བའི་གནས་སྟངས་འདི་ འཁྲུལ་སི་སི་་ཅིག་སྦེ་འཐོན་ཡི་ཟེར་ཨིན་མས།
འདི་གི་ཤུལ་ལས་ རྒྱལ་ཡོངས་ཚོགས་འདུའི་ ཚོགས་དཔོན་གྱི་ཡིག་ཚང་ནང་ལུ་སྦེ་ སྤྱི་ཚོགས་ཀྱི་འཐུས་མི་ཚུ་གི་ཧོང་ལས་ ཚོགས་དཔོན་གྱིས་ དྲག་ཤོས་ལུ་ འདས་པའི་ལོ་ཕྱེད་དང་༣གྱི་རིང་ མི་སེར་ལུ་ ཕྱག་ཕྱིད་གང་དྲག་ཞུ་སྟེ་ཡོད་མི་ལུ་ དགའ་ཚོར་ཡོད་ཟེར་ གསུངས་གནང་ཡི།
དྲག་ཤོས་ཀྱིས་ མོང་སྒར་འདེམས་ཁོངས་ནང་ལས་ སྤྱི་ཚོགས་ཀྱི་འཐུས་མི་སྦེ་ ཕྱག་ཞུ་སྟེ་ཡོདཔ་ཨིན།
དྲག་ཤོས་ ཤེས་རབ་རྒྱལ་མཚན་གྱིས་ འདས་པའི་ཟླཝ་ནང་ བློན་ཆེན་ལུ་ དགོངས་ཞུའི་ཞུ་ཡིག་ཕུལ་བའི་ཤུལ་མ་ འཕྲལ་ཁམས་ཅིག་ཁར་ ཚོགས་དཔོན་ལུ་ཡང་ཕུལ་ཡོདཔ་ཨིན་མས།
ཆེ་མཐོ་ཁྲིམས་ཀྱི་འདུན་སའི་ གྲངས་མང་ཁྲིམས་ཁྲི་གིས་ དྲག་ཤོས་ལུ་ ཚུལ་མིན་གྱི་ཐོག་ལས་ སྣུམ་འཁོར་ཉེན་བཅོལ་འབད་ཡོད་པའི་ ཉེས་པ་ལུ་ ཟླཝ་༢ཀྱི་ བཙོན་ཁྲིམས་བཀལ་ཏེ་ཡོདཔ་ཨིན།
དྲག་ཤོས་ཀྱིས་ ཚུལ་མིན་གྱི་ སྣུམ་འཁོར་ཉེན་བཅོལ་འདི་ཡང་ སྤྱི་ལོ་༢༠༡༦ལུ་ འབད་དེ་ཡོདཔ་སྦེ་ སྙན་ཞུ་འབད་དེ་འདུག
ད་རེས་བཟུམ་ཅིག་འབད་བ་ཅིན་ ནང་སྲིད་བློན་པོ་བགྲེསཔ་གིས་ གནད་དོན་འདི་ མངོན་མཐོ་ཁྲིམས་ཀྱི་འདུན་ས་ལུ་ མཐོ་གཏུགས་ཞུ་སྟེ་ཡོདཔ་ཨིན།
རྒྱལ་ཡོངས་ཚོགས་འདུ་གིས་ རྒྱལ་ཡོངས་ཚོགས་འདུའི་བཅའ་ཁྲིམས་ཀྱི་ དོན་ཚན་༢༠ཅན་མ་དང་འཁྲིལ་ མོང་སྒར་དང་ ངང་ལམ་འདེམས་ཁོངས་ཀྱི་དོན་ལུ་ འདེམས་ཁྲི་སྟོངམ་འཐོན་ཏེ་ཡོདཔ་སྦེ་ གསལ་བསྒྲགས་འབད་དེ་འདུག
རྒྱལ་ཡོངས་ཚོགས་འདུ་དང་འཁྲིལ་བ་ཅིན་ ཚོགས་དཔོན་གྱིས་ འབྲུག་གི་བཙག་འཐུ་ལྷན་ཚོགས་ལུ་ འདེམས་ཁྲི་སྟོངམ་འཐོན་མི་ཚུ་ བསུབ་དགོ་པའི་སྐོར་ལས་ ཡི་གུ་བཏང་སྟེ་ཡོདཔ་སྦེ་བཤད་ཅི།
ངང་ལམ་འདེམས་ཁོངས་ཀྱི་ འདེམས་ཁྲི་འདི་ཡང་ འདས་པའི་ཟླཝ་ནང་ སྤྱི་ཚོགས་ཀྱི་འཐུས་མི་གྱོང་པའི་ཤུལ་མ་ སྟོངམ་འཐོན་སྟེ་ཡོདཔ་ཨིན།
གནས་ཚུལ་བསྡུ་ལེན་འབད་མི་ ཚེ་རིང་བཟངམོ། ཐིམ་ཕུག
