འཛམ་གླིང་ནང་ལུ་ བཙོག་རླུང་མར་ཕབ་འབད་ནི་གི་དོན་ལུ་རྒྱབ་སྐྱོར།

སྤྱི་ཟླ་༩ པའི་ཚེས་ ༢༥ ༢༠༡༩

༉ བློན་ཆེན་ ཌོག་ཊར་བློ་གྲོས་ཚེ་རིང་གིས་ འཛམ་གླིང་སྤྱི་ཚོགས་གནམ་གཤིས་དང་ལེན་གྱི་ ཞལ་འཛོམས་གཅིག་ཚོགས་པའི་སྐབས་ གོང་འཕེལ་ཉུང་སྦེ་འགྱོ་ཡོད་པའི་རྒྱལ་ཁབ་ཚུ་གིས་ སྤྱི་ལོ་༢༠༣༠གི་ནང་འཁོད་ གནམ་གཤིས་གདོང་ལེན་གྱི་ཐབས་ལམ་དང་ སྤྱི་ལོ་༢༠༥༠གི་ནང་འཁོད་ བཙོག་རླུང་གི་གནད་དོན་ཚུ་ མ་པ་ལས་རང་མེདཔ་སྦེ་ བཟོ་ནི་གི་འཆར་གཞི་ཡོད་ཟེར་གསུངས་ནུག

ད་རུང་ བློན་ཆེན་གྱིས་ འཆར་གཞི་ཚུ་ ལག་ལེན་འཐབ་ནི་གི་དོན་ལུ་ རྒྱལ་སྤྱིའི་མི་སྡེ་ཚུ་གིས་ ཤུལ་མའི་ལོ་༡༠་གྱི་རིང་ལུ་ རྒྱབ་སྐྱོར་སྦེ་ ཡུ་ཨེསི་ཌོ་ལར་ས་ཡ་༤༥༠གནང་དགོཔ་སྦེ་ཡང་ ཞུ་བ་འབད་དེ་འདུག

འདི་བཟུམ་སྦེ་ བློན་ཆེན་ འཛམ་གླིང་གི་དབུ་ཁྲིདཔ་ཚུ་ལུ་ སྤྱི་ལོ་༢༠༢༠གི་ནང་འཁོད་ གནམ་གཤིས་འགྱུར་དྲོད་དང་འབྲེལ་བའི་ཁས་བླངས་དང་ བཙོག་རླུང་མར་ཕབ་ཀྱི་ ཡུན་བརྟན་ཐབས་བྱུས་ཚུ་ བརྩམ་དགོ་པའི་སྐོར་ལས་ ཞུ་བ་འབད་དེ་འདུག

གོང་འཕེལ་ཉུང་སུ་འགྱོ་མི་ རྒྱལ་ཁབ་ཚུ་གིས་འབད་བ་ཅིན་ སྤྱི་ལོ་༢༠༢༠གི་ནང་འཁོད་ རྒྱལ་ཡོངས་མཐུན་འགྱུར་གྱི་འཆར་གཞི་ དེ་ལས་ ཡུན་བརྟན་ཐོག་ལས་ ནག་རླུང་མར་ཕབ་དང་ གནམ་གཤིས་འགྱུར་དྲོད་ཀྱི་ གདོང་ལེན་ཐབས་བྱུས་ཚུ་ གྲ་སྒྲིག་འབད་ནི་ནང་ རྒྱལ་ཡོངས་ལུ་རྒྱབ་སྐྱོར་འབད་དགོཔ་སྦེ་ཨིན་མས།

ད་རུང་ བློན་ཆེན་གྱིས་ འཛམ་གླིང་གི་དབུ་ཁྲིདཔ་ཚུ་ལུ་ཞུ་མི་ནང་ ད་རེས་ ག་དེ་ཅིག་སྦེ་ འཛམ་གླིང་གི་ཁ་ཐུག་ལས་ གནམ་གཤིས་འགྱུར་དྲོད་ཀྱི་གནད་དོན་ཚུ་ སེལ་ཐབས་སྒྲིག་མ་ཚུགས་པ་ཅིན་ སྔོ་ལྗང་དང་ལྡན་པའི་ནགས་ཚལ་དང་ ཁཝ་གིས་སྤུབས་ཡོད་པའི་གངས་རི་ དེ་ལས་ གཙང་སྦྲ་དང་ལྡན་པའི་ འབྲུག་པའི་གཙང་ཆུ་ མ་འོངས་པའི་མི་རབས་ཚུ་ལུ་ རྩིས་སྤྲོད་མ་ཚུགས་པའི་ ཚ་གྱང་ཡོད་ཟེར་གསུང་ཡི།

འདི་བཟུམ་སྦེ་ བློན་ཆེན་གྱིས་ འཛམ་གླིང་གི་དབུ་ཁྲིདཔ་ཚུ་ལུ་ པེ་རིས་ཀྱི་འགན་ཡིག་ནང་ ཚ་དྲོད་ཀྱི་ཚད་གཞི་ཌིགིརི་སེལ་ཤི་ཡཱསི་ཕྱེད་ད་༢སྦེ་ བཀོད་དེ་ཡོད་མི་འདི་གིས་མི་བཏུབ་ཟེར་ཡང་ དྲན་གསོ་ཕུལ་ནུག

ད་རུང་ བློན་ཆེན་གྱིས་ རྒྱལ་སྤྱིའི་མི་སྡེ་ཚུ་ལུ་ གནམ་གཤིས་འགྱུར་དྲོད་ལས་བརྟེན་པའི་གནོད་པ་འདི་ གོང་འཕེལ་ཉུང་སྦེ་འགྱོ་ཡོད་པའི་རྒྱལ་ཁབ་ཚུ་ལུ་ སྦོམ་སྦེ་རང་ཕོག་སྟེ་ཡོདཔ་སྦེ་ དྲན་གསོ་ཞུ་ཡི།

བློན་ཆེན་གྱིས་ འཛམ་གླིང་སྤྱི་ཚོགས་གནམ་གཤིས་དང་ལེན་གྱི་ཞལ་འཛོམས་ནང་ཡང་ འཛམ་གླིང་སྤྱི་ཚོགས་ཀྱི་ཡོངས་ཁྱབ་ཞལ་འཛོམས་འདི་ འགོ་མ་བཙུགས་པའི་ཧེ་མ་ ནིའུ་ཡོག་ལུ་སྦེ་ གྲལ་བཞུགས་གནང་སྟེ་ཡོདཔ་ཨིན།

འདི་དང་གཅིག་ཁར་ འཛམ་གླིང་སྤྱི་ཚོགས་ཀྱི་ཡོངས་ཁྱབ་དྲུང་ཆེན་ ཨེཎ་ཊི་ནོ་ཇཱསི་ཏརསི་གིས་ འཛམ་གླིང་གི་དབུ་ཁྲིདཔ་ཚུ་ལུ་ པེ་རིསི་གི་འགན་ཡིག་འདི་ བསྟར་སྤྱོད་འབད་ནི་གི་དོན་ལུ་ འོས་འབབ་དང་ཉེན་ཐུབ་ཡོད་པའི་འཆར་གཞི་ཚུ་ བརྩམས་ཏེ་འོང་དགོཔ་པའི་ ཞུ་བ་འབད་དེ་འདུག

འགན་ཡིག་འདི་ནང་ འཐུས་མི་རྒྱལ་ཁབ་ཚུ་གིས་ ནག་རླུང་མར་ཕབ་འབད་དེ་ འཛམ་གླིང་གི་ཚ་དྲོད་འདི་ ཌིགིརི་སེལ་ཤི་ཡཱསི་ཕྱེད་ད་༢ཀྱི་འོག་ལུ་ རྒྱུན་སྐྱོང་འབད་དགོ་པའི་ འགན་དབང་ཡོདཔ་སྦེ་ཨིན་མས།

འབྲུག་རྒྱལ་ཁབ་འདི་ གོང་འཕེལ་ཉུང་སྦེ་འགྱོ་ཡོད་པའི་རྒྱལ་ཁབ་ཚུ་གི་ ཁྲི་འཛིན་ཅིག་ཡང་ཨིན་མས།