༉ རྩི་རང་གི་ཁྲིམས་སྲུང་འགག་པ་གིས་ དར་དཀར་ན་ལས་ སྐྱེས་ལོ་༢༦ལང་མི་ཕོ་སྐྱེས་གཅིག་ སྐྱེས་ལོ་༡༣ལང་མི་ བུམོ་ཅུང་གཅིག་ལུ་ དབང་བཙོང་འདོད་སྤྱོད་འབད་ཡོད་པའི་དོགས་པ་ལུ་ སྤྱི་ཟླ་འདི་གི་སྤྱི་ཚེས་༧ལུ་བཟུང་ནུག
དོགས་པ་ཅན་ཕོ་སྐྱེས་འདི་ རྩི་རང་ལུ་ སྣུམ་འཁོར་བཅོས་ཁང་ཅིག་ནང་ལུ་ ལཱ་འབད་སྡོད་མི་ཨིན་མས།
གནས་ཚུལ་འབྱུང་ཁུངས་དང་འཁྲིལ་བ་ཅིན་ བུམོ་ཅུང་འདི་ སྤྱི་ཟླ་འདི་གི་སྤྱི་ཚེས་༥་ལུ་ ཁྱིམ་ནང་འོང་མ་བཏུབ་པར་ འདི་གི་ནངས་པ་ ལྷོད་དེ་ཡོདཔ་སྦེ་ཨིན་མས།
ད་རུང་ ཁོང་གཉིསཔ་འདི་ མི་སྡེ་བརྡ་བརྒྱུད་ ཕེས་བུཀ་ནང་ལས་སྦེ་ འཕྱད་དེ་ཡོདཔ་སྦེ་ཨིན་མས།
འབྲུག་གི་ཉེས་འགེལ་ཁྲིམས་དེབ་དང་འཁྲིལཔ་ད་ སྐྱེས་ལོ་༡༢་ཡན་ཆད་འབད་མི་ལུ་ དབང་བཙོང་འདོད་སྤྱོད་འབད་བ་ཅིན་ འདི་ལུ་ དབྱེ་རིམ་གཉིས་པའི་ཉེས་ཁྲིམས་ བཙོན་ཁྲིམས་ལོ་༩ལས་༡༥གི་བར་ན་ ཕོག་ནི་ཨིན་མས།
གནས་ཚུལ་བསྡུ་ལེན་འབད་མི་ པདྨ་ཚེ་དབང་། རྩི་རང་།
