༉ ལོ་བསྟར་བཞིན་དུ་ རང་ཟླ་ ༨ པའི་ནང་ སྤུ་ན་ཁ་རྫོང་ནང་གནང་མི་ ཚེས་བཅུ་འདི་ དགེ་སློང་ཚུ་གིས་ རྫོང་ནང་ གསུང་ཆོས་འདི་རང་གནངམ་མ་གཏོགས་ ཚེས་བཅུ་གཞན་ཚུ་བཟུམ་སྦེ་ སྐུ་འཆམ་དང་ རང་ལུགས་ཀྱི་ལས་རིམ་ཚུ་ ག་ནི་ཡང་མེདཔ་ལས་ ཚེས་བཅུ་འདི་གི་སྐོར་ལས་ སྤུ་ན་ཁ་དང་ ཉེས་འདབས་ཀྱི་མི་སེར་ཚུ་གིས་མ་གཏོགས་ གཞན་མི་མང་ཤོས་ཅིག་གིས་རང་ མི་ཤེས་དོ་ཡོདཔ་ཨིན་མས།
སྤུ་ཁ་ཁའི་ལོ་བསྟར་ཚེས་བཅུ་འདི་ སྤུ་ན་ཁ་རྫོང་གི་ཀུན་ར་ནང་སྦེ་ གཞུང་གྲྭ་ཚང་གི་མ་ཆེན་གཟིམ་དཔོན་དང་ རྩེ་གཟིམ་གྱིས་ དབུ་བཞུགས་མཛད་དེ་གནང་ནུག
མ་ཆེན་གཟིམ་དཔོན་དང་འཁྲིལཔ་ད་ ཚེས་བཅུ་འདི་གི་སྐོར་ལས་ མི་གིས་ ཧ་མ་གོ་མི་འདི་ཡང་ ཚེས་བཅུའི་སྐབས་ལུ་ སྐུ་འཆམ་དང་ གཞན་མི་རང་ལུགས་ཀྱི་ལས་རིམ་ཚུ་ ཕུལ་ནི་མེད་ནི་འདི་གིས་ཨིནམ་འོང་ཟེར་བཤད་ཅི།
ད་རུང་ ཁོ་གིས་སླབ་མི་ནང་ ཚེས་བཅུ་འདི་ཡང་ དུས་རབས་ ༡༧ པའི་ནང་ ཞབས་དྲུང་རིན་པོ་ཆེ་གིས་ གུ་རུ་རིན་པོ་ཆེའི་དུས་ཆེན་ལུ་ གུས་བསྟུད་ཕུལ་ནི་དང་བརྩི་སྲུང་ཞུ་ནི་གི་དོན་ལས་ འགོ་བཙུགས་གནང་ནུག་ཟེར་ཨིན་མས།
ཉིནམ་ ༣ གྱི་ཚེས་བཅུ་གྲོལ་ཞིནམ་ལས་ བྱིན་ཅན་གྱི་ནང་རྟེན་ལེ་ཤ་ཅིག་ར་ མི་དམངས་ལུ་ མཇལ་ཁ་གནང་ཡོདཔ་མ་ཚད་ གཞུང་གྲྭ་ཚང་གི་ཧོངས་ལས་ མི་སེར་ཚུ་ལུ་ ཞབས་དྲུག་དག་སྣང་མའི་ཚེ་དབང་ཡང་གནང་ནུག
སྤུ་ན་ཁའི་ཚེས་བཅུ་འདི་ ལོ་བསྟར་བཞིན་དུ་ རང་ཟླ་ ༨ པའི་ནང་ གནངམ་ཨིན་མས།
ད་རུང་ སྤུ་ན་ཁ་ལུ་ སྤྱིར་བཏང་གི་ཚེས་བཅུ་ཅིག་ཡང་ གནང་སྲོལ་ཡོདཔ་ད་ འདི་ཡང་ སྤྱི་ལོ་ ༢༠༠༥ ལས་ འགོ་བཙུགས་ནུག
རང་ཟླ་དང་པའི་ནང་ སྒྲོམ་མཆོད་ཀྱི་ཤུལ་ལས་གནང་མི་ ཚེས་བཅུ་བསྒང་འབད་བ་ཅིན་ སྐུ་འཆམ་དང་ རང་ལུགས་ཀྱི་ལས་རིམ་ཚུ་ གནང་སྲོལ་ཡོདཔ་ཨིན་མས།
