༉ སྤུ་ན་ཁ་ དཀར་སྦི་ས་རྒེད་འོག་ དཔལ་ལྟ་རི་སྤྱི་འོག་གི་མི་སེར་ཚུ་གིས་ གཞུང་ལུ་ ལོ་ ༢༠ དེ་ཅིག་གི་ཧེ་མ་སེལ་ཡོད་མི་ སྤྱི་འོག་གི་སོ་ནམ་ཞིང་ལམ་འདི་ རྩི་ནག་གཏང་དགོ་པའི་ ཞུ་བ་འབདཝ་ཨིན་མས།
འདི་ཡང་ མི་ཚུ་གིས་སླབ་མི་ནང་ ཀི་ལོ་མི་ཀྲར་ ༧ དེ་ཅིག་འབད་མི་ ཞིང་ལམ་བདའ་སྟེ་ ཧོག་ཀ་ཚུ་འཐོན་ཏེ་ཡོདཔ་ལས་ སོ་ནམ་གྱི་ཐོན་སྐྱེད་ཚུ་ ཁྲོམ་ཁར་སྐྱེལ་ནི་ནང་ སྟབས་མ་བདེཝ་ལེ་ཤ་འཐོནམ་མས་ཟེར་བཤད་ཅི།
སོ་ནམ་ཞིང་ལམ་འདི་ཡང་ སྤྱི་འོག་ནང་གི་ཁྱིམ་གུང་པ་ ༤༥ དེ་ཅིག་གིས་ ལག་ལེན་འཐབ་དོ་ཡོདཔ་ཨིན་མས།
ཧེ་མ་ཚར་གཅིག་ ལམ་འདི་བདའ་སྟེ་ ས་དང་རྡོ་རུ་ཚུ་བླུགས་མི་འདི་གིས་ མི་སེར་ཚུ་ལུ་ ཕན་ཐོགས་འབྱུང་སྟེ་ཡོད་རུང་ ཤུལ་ལས་ ལམ་གྱི་གནས་སྟངས་འདི་ སྐྱོ་དྲགས་ཐལ་ནི་འགོ་བཙུགས་ནུག
མི་ཚུ་དང་འཁྲིལཔ་ད་ ཧེ་མ་འབད་བ་ཅིན་ གླ་འཁོར་གྱི་གླ་འདི་ དངུལ་ཀྲམ་ ༢༠༠ དེ་ཅིག་ལས་བརྒལ་མི་གནས་དོ་ཡོད་རུང་ ད་རེས་ དངུལ་ཀྲམ་ ༤༠༠ དང་ ༥༠༠ དེ་རེ་སྤྲོད་རུང་ཡང་ གླ་འཁོར་ཚུ་གིས་ འོང་མི་བཏུབ་པས་ཟེར་བཤད་ཅི།
རྒེད་འོག་བདག་སྐྱོང་གི་འགོ་དཔོན་ཚུ་གིས་སླབ་མི་ནང་ ལམ་འདི་ རྩི་ནག་གཏང་ནི་གི་དོན་ལུ་ མ་དངུལ་ལངམ་སྦེ་མེད་ཟེར་ཨིན་མས།
ཨིན་རུང་ རྫོང་ཁག་བདག་སྐྱོང་གི་འགོ་དཔོན་ཚུ་དང་འཁྲིལཔ་ད་ ལོ་ལྔའི་འཆར་གཞི་ ༡༣ པའི་ནང་ སྤྱི་འོག་གི་སོ་ནམ་ཞིང་ལམ་འདི་ རྩི་ནག་གཏང་ནི་གི་དོན་ལུ་ གོང་འཕེལ་གྱི་ལས་འགུལ་ཆུང་བ་ནང་ལས་ མ་དངུལ་ས་ཡ་ ༣༣ ལྷགཔ་ཅིག་གནང་དགོ་པའི་ གྲོས་འཆར་ཕུལ་ཡོདཔ་སྦེ་ཨིན་མས།
དཔལ་ལྟ་རི་སྤྱི་འོག་གི་མི་སེར་ཚུ་གིས་ འོང་འབབ་བཟོ་ནི་གི་དོན་ལས་ བྱཱ་ལཱ་དང་ཚོད་བསྲེ་ཚུ་གི་ལཱ་ཚུ་ འབད་དོ་ཡོདཔ་ཨིན་མས།
