༉ བསམ་རྩེ་ རྟ་ལྡིང་རྒེད་འོག་ནང་ཡོད་པའི་ བཀྲ་ཤིས་ཐང་འབྲིང་རིམ་སློབ་གྲྭ་བར་མ་འདི་ འཕྲལ་ཁམས་གཅིག་ཁར་ རྒྱ་སྐྱེད་འབད་དེ་ཡོད་རུང་ སློབ་གྲྭ་ནང་ ཟ་སྤྱོད་ཁང་དང་ སྤྱི་དོན་ཁང་ཚུ་ལེགས་ཤོམ་མེདཔ་ལས་ སློབ་དཔོན་དང་སློབ་ཕྲུག་ཚུ་གིས་ ཉིན་བསྟར་གྱི་ལཱ་དང་ལས་རིམ་ཚུ་ འགོ་འདྲེན་འཐབ་མ་ཚུགས་པར་ ལཱ་ཁག་གཏང་དོ་ཡོདཔ་ཨིན་མས།
སློབ་གྲྭ་རྒྱ་སྐྱེད་འབད་མི་འདི་གིས་ རྟ་ལྡིང་དང་སྦོ་ལོགས་ཁའི་ རྒེད་འོག་གི་ཨ་ལུའི་ཕམ་ཚུ་ སེམས་དགའ་སྟེ་ཡོད་རུང་ འདི་དང་བསྟུན་པའི་ སྟབས་མ་བདེཝ་ཚུ་ཡང་འཐོན་ནུག
འདི་ཡང་ ཧེ་མ་ སློབ་གྲྭ་འདི་ནང་ ཚན་རིག་འཕྲུལ་རིག་དང་བཟོ་རིག་རྩིས་ཀྱི་ སློབ་དཔོན་མ་ལང་པའི་ཁར་ ནང་ཆས་ཚུ་ཡང་ལང་མ་ཚུགས་པའི་ དཀའ་ངལ་འཐོན་ཡོདཔ་ཨིན་མས།
ད་རུང་ ཚན་རིག་གི་བརྟག་དཔྱད་ཁང་དང་ དཔེ་མཛོད་ཁང་བཟུམ་མའི་ མཐུན་རྐྱེན་ཚུ་ཡང་ བསྒྲུབ་མ་ཚུགས་པར་འདུག
ད་རེས་ སྟབས་མ་བདེཝ་འདི་ཚུ་ ཧ་ལམ་སེལ་ཚར་ཏེ་འབད་རུང་ སྤྱི་དོན་ཁང་དང་ ཟ་སྤྱོད་ཁང་ཚུ་རྩིས་ཏེ་ གཞན་མི་མཐུན་རྐྱེན་ཚུ་ ལེགས་ཤོམ་ཅིག་མེདཔ་ཨིན་མས།
ཟ་སྤྱོད་ཁང་རྙིངམ་འདི་ ཆུང་སུ་ཅིག་འབདཝ་ལས་ འདི་ནང་ སློབ་ཕྲུག་དག་པ་ཅིག་ལས་བརྒལ་ མི་ཤོང་དོ་ཡོདཔ་ལས་ ད་རེས་ སློབ་ཕྲུག་ཚུ་ བཞེས་སྒོ་ཡང་ ཉིམ་ཤར་རུང་དང་ ཆརཔ་རྐྱབ་རུང་ ཕྱི་ཁར་སྦེ་ཟ་དགོ་དོ་ཡོདཔ་ཨིན་མས།
གནད་དོན་འདི་གི་སྐོར་ལས་ འཕྲལ་ཁམས་གཅིག་ཁར་ཚོགས་མི་ རྫོང་ཁག་ཚོགས་འདུ་ནང་ རྟ་ལྡིང་རྒཔོ་ཡཱམ་བྷ་དུར་ག་ལེ་གིས་ ཚ་གྱང་ཡོད་ལུགས་ཚུ་ཞུ་ནུག
འདི་ལུ་ རྫོང་ཁག་ཤེས་རིག་འགོ་དཔོན་གྱིས་ སྟབས་མ་བདེཝ་ཚུ་ཡོདཔ་ཨིནམ་འདི་ ཧ་གོ་སྟེ་ཡོདཔ་ལས་ མཐུན་རྐྱེན་འདི་ཚུ་རྐྱབ་ནི་འདི་ ལོ་ལྔའི་འཆར་གཞི་ ༡༣ པའི་ནང་ བཙུགས་ཏེ་ཡོད་ཟེར་ཨིན་མས།
ཨིན་རུང་ ད་རེས་ འཆར་དངུལ་ཚད་ཅིག་ལས་བརྒལ་མེདཔ་ལས་ མཐུན་རྐྱེན་འདི་ཚུ་ ནམ་རྐྱབ་ཚུགས་ག་གི་ཐད་ཁར་ གཏན་གཏན་ཅིག་མེད་ཟེར་ཨིན་མས།
ད་རུང་ རྒཔོ་གིས་ སློབ་གྲྭ་འདི་ སློབ་གྲྭ་ལྟེ་བ་བཟོ་མ་ཚུགས་མི་ལུ་ སེམས་ཕམ་སྟེ་ཡོད་ཟེར་ཨིནམ་ད་ སློབ་གྲྭ་ལྟེ་བ་སྦེ་བཟོ་བ་ཅིན་ འདི་བཟུམ་མའི་མཐུན་རྐྱེན་ཚུ་ མགྱོགས་སུ་ཅིག་སྦེ་ རྐྱབ་རྐྱབ་འོང་ཟེར་ཨིན་མས།
ཨིན་རུང་ རྫོང་ཁག་ཚོགས་འདུ་གིས་ ཁག་ཆེ་བའི་མཐུན་རྐྱེན་ཚུ་རྐྱབ་ནི་གི་དོན་ལུ་ མ་དངུལ་ཁ་སྐོང་གནང་དགོ་པའི་སྐོར་ལས་ སྙན་ཞུ་ཁ་གསལ་ཅིག་ ཤེས་རིག་དང་རིག་རྩལ་གོང་འཕེལ་ལྷན་ཁག་ལུ་ཕུལ་ནི་སྦེ་ ཐག་བཅད་ནུག
མདང་ཞག་ལས་ སློབ་གྲྭ་འདི་ནང་ སློབ་རིམ་བཅུ་པ་འགོ་བཙུགསཔ་དང་འབྲེལ་ སློབ་གྲྭ་ནང་ སློབ་ཕྲུག་གི་གྱངས་ཁ་ཡང་ ༧༣༠ ལྷགཔ་ཅིག་ལུ་ ཡར་སེང་སོང་ཡོདཔ་ལས་ མཐུན་རྐྱེན་འདི་ཚུ་ཡང་ ཁག་ཆེཝ་སྦེ་ར་འཐོན་ཏེ་འདུག
