༉ ཐིམ་ཕུག་ ཆུ་ཚོད་འཁོར་ལོ་ཀ་ཆེན་གྱི་ས་སྒོ་ནང་ ཉིནམ་ ༣ གྱི་རིང་ ཚེ་བཅུ་གི་འགྲེམ་སྟོན་ལས་རིམ་ཅིག་ འགོ་འདྲེན་འཐབ་ས་ལུ་ ནང་འཁོད་ཀྱི་ཐོན་སྐྱེད་དང་ རང་ལུགས་ཀྱི་བཞེས་སྒོ་ཚུ་ འགྲེམ་སྟོན་འབད་བའི་བསྒང་རང་འདུག
འགྲེམ་སྟོན་ལས་རིམ་འདི་ཡང་ བཟོ་གྲྭ་ཚོང་ལས་དང་ལཱ་གཡོག་ལྷན་ཁག་གིས་ འབྲུག་ཨམ་སྲུའི་ཚོང་ལཱ་ཚོགས་པ་དང་ སྒེར་གྱི་ཚོང་ལས་ཁང་ཅིག་དང་མཉམ་འབྲེལ་འབད་དེ་ འགོ་འདྲེན་འཐབ་དོ་ཡོདཔ་ཨིན་མས།
འགོ་འདྲེན་འཐབ་མི་ཚུ་དང་འཁྲིལཔ་ད་ ལས་རིམ་འདི་ཡང་ མི་དབང་རྒྱལ་སྲསམོ་མཆོག་གི་ འཁྲུངས་སྐར་དུས་སྟོན་བརྩི་སྲུང་ཞུ་ནི་གི་དོན་ལུ་ འགོ་འདྲེན་འཐབ་དོ་ཟེར་བཤད་ཅི།
ཚེས་བཅུ་གི་འགྲེམ་སྟོན་ལས་རིམ་ནང་ ནང་འཁོད་ཀྱི་ཐོན་སྐྱེད་ཚུ་ གསལ་སྟོན་འབད་དེ་ ཚོང་འབྲེལ་གྱི་ལམ་དང་ ཚོང་ལཱ་འབད་ནི་ནང་ སེམས་ཤུགས་བྱིན་ནི་གི་དམིགས་གཏད་བསྐྱེདཔ་ཨིན་མས།
འདི་བཟུམ་སྦེ་ ལས་རིམ་འདི་གིས་ གྲོང་གསེབ་ཀྱི་ཨམ་སྲུ་ཚུ་ལུ་ བལྟ་རྒྱ་མཐོང་རྒྱ་དང་ གོ་སྐབས་ཚུ་བྱིན་ནི་གི་དམིགས་ཡུལ་ཡང་ བསྐྱེད་དོ་ཡོདཔ་ཨིན་མས།
ལས་རིམ་འདི་ནང་ ཟླ་པ་དང་བང་ཅུང་ དེ་ལས་ ཡ་ཁྲ་གི་ཐོན་སྐྱེད་དང་ རྫོང་ཁག་སོ་སོ་ཚུ་ནང་ལས་ ས་གནས་ཀྱི་བཞེས་སྒོ་ཚུ་ འགྲེམ་སྟོན་འབདཝ་ཨིན་མས།
ལས་རིམ་ནང་ གྲལ་ཁར་གཏོགས་མི་ཚུ་གིས་སླབ་མི་ནང་ འགྲེམ་སྟོན་འདི་ལས་བརྟེན་ ཁོང་རའི་ཐོན་སྐྱེད་ཚུ་བཙོང་ནི་དང་ ཚོང་ལམ་ཚུ་ཐོབ་ནི་ནང་ ཕན་ཐོགས་འབྱུང་ཡི་ཟེར་བཤད་ཅི།
ལས་རིམ་འདི་ནང་ ནང་བཟོ་དང་བཟོ་གྲྭ་ཆུང་བ་དང་ ཚོང་ལཱ་འགོ་བཙུགས་ལྟེ་བ་ དེ་ལས་ གྲོང་གསེབ་ཨམ་སྲུའི་ཚོང་ལཱ་ཚོགས་པ་རྩིས་ཏེ་ རྫོང་ཁག་ ༡༢ ནང་ལས་ མི་ངོམ་ ༤༥ གིས་ གྲལ་ཁར་གཏོགས་པའི་བསྒང་རང་འདུག
ལས་རིམ་འདི་ནང་ གྲལ་ཁར་གཏོགས་མི་ཚུ་གིས་ ཚོང་ཁྱིམ་ཚུ་གི་དོན་ལས་ གླ་སྤྲོད་མི་དགོ་ནི་ཨིན་མས།
