༉ ཆུ་ཁ་རྫོང་ཁག་ གདུང་ན་རྒེད་འོག་གི་མི་སེར་ཚུ་ རྒེད་འོག་ནང་ ལྷ་ཁང་རྙིང་ཤོས་ཅིག་ལས་བརྒལ་མེད་མི་འདི་ ཉམས་ཆག་ཤོར་དོ་ཡོད་མི་ལུ་ ཚ་གྱང་ལང་སྟེ་འདུག
མ་གཞི་ ལྷ་ཁང་འདི་ ཉམས་གསོ་ཨ་ཙི་རེ་ཞུ་སྟེ་ཡོད་རུང་ གྱང་ཚུ་གུ་ སེར་གུ་འཐོན་ཡོདཔ་མ་ཚད་ འཐིང་གཞི་ཚུ་ཡང་ མེདཔ་ཐལ་ཏེ་ཡོདཔ་ཨིན་མས།
གདུང་ན་ལྷ་ཁང་འདི་ དུས་རབས་ ༡༦ པའི་ནང་བཞེངས་ཡོདཔ་སྦེ་ ཡིད་ཆེས་བསྐྱེད་དོ་ཡོདཔ་ད་ ལྷ་ཁང་འདི་ ལོ་ ༡༠ དེ་ཅིག་གི་ཧེ་མ་ ཉམས་གསོ་ཞུ་ཡོདཔ་ཨིན་མས།
ཨིན་རུང་ ལྷ་ཁང་གི་གནས་སྟངས་འདི་ སྐྱོ་སུ་ཐལ་ཏེ་ར་ཡོདཔ་ལས་ ཆརཔ་རྐྱབ་ད་ལུ་ ལྷ་ཁང་ནང་ན་ ཆུ་འཛགས་དོ་ཡོདཔ་ཨིན་མས།
མི་སེར་ཚུ་གིས་ གནད་དོན་འདི་གི་སྐོར་ལས་ རྒེད་འོག་བདག་སྐྱོང་ལུ་ ཚ་གྱང་ཚུ་བཤད་དེ་ཡོད་རུང་ ཁོང་གིས་སླབ་མི་ནང་ རྒྱལ་ཁབ་ཀྱི་དངུལ་འབྲེལ་གྱི་ལམ་ལུགས་དང་འཁྲིལཔ་ད་ རྒེད་འོག་གིས་ཡང་ ལྷ་ཁང་འདི་ཉམས་གསོ་ཞུ་སྟེ་ མིང་སེར་ཚུ་ལུ་ ཆ་རོགས་འབད་ཚུགས་པའི་ ལམ་ཅིག་མིན་འདུག་ཟེར་ཨིན་མས།
ས་གནས་གཞུང་གི་ལོ་བསྟར་གནང་སྦྱིན་ལམ་ལུགས་དང་འཁྲིལཔ་ད་ དགོས་མཁོ་དང་བསྟུན་ ལམ་སྲོལ་དང་ ཆོས་དང་འབྲེལ་བའི་སྲོལ་ཁྱུན་ཚུ་ ཉམས་སྲུང་དང་དར་ཁྱབ་གཏང་ནི་གི་ལཱ་དང་ལས་རིམ་ཚུ་གི་དོན་ལུ་ ལོ་བསྟར་གྱི་གནང་སྦྱིན་ལས་ བརྒྱ་ཆ་ ༡༠ ལས་བརྒལ་ གཏང་མ་ཆོགཔ་སྦེ་འཁོད་དེ་འདུག
གདུང་ན་གི་མི་སེར་ཚུ་དང་འཁྲིལཔ་ད་ འདི་བཟུམ་མའི་ལཱ་དང་ལས་རིམ་གྱི་དོན་ལུ་ ལག་ལེན་འཐབ་ཆོག་པའི་ མ་དངུལ་འདི་གིས་ མ་པ་ལས་ར་ ལང་མི་ཚུགས་དོ་ཡོདཔ་ལས་ དེམ་ཅིག་གི་བར་ན་ རྒྱལ་རབས་ཅན་གྱི་སྲོལ་རྒྱུན་ཚུ་ མེདཔ་ཐལཝ་མས་ཟེར་ཨིན་མས།
འདི་དང་གཅིག་ཁར་ གདུང་ན་ལྷ་ཁང་ཉམས་ཆག་ཤོར་དོ་ཡོད་མི་ལུ་ མི་སེར་ཚུ་གིས་ གནས་སྐབས་ཀྱི་ཐབས་ལམ་ཚུ་བཏོན་ཏེ་འདུག
ཆརཔ་ནང་ན་འཛགས་མ་བཅུག་ནི་གི་དོན་ལུ་ གནམ་སྤང་གུ་ལས་ ལྕགས་ཤོག་ཚུ་བཀབ་སྟེ་ཡོདཔ་ད་ ནང་ན་འབད་བ་ཅིན་ འཐིང་གཞི་མེདཔ་ཐལ་ཡོད་མི་ཚུ་གུ་ལུ་ གདན་དམརཔོ་ཚུ་འཐིང་སྟེ་ཡོདཔ་ཨིན་མས།
འདི་ཡང་ ལྷ་ཁང་གི་གནས་སྟངས་འདི་ ཧེང་སྐལ་མེདཔ་ཐལ་མི་བཅུག་ནི་དང་ སྐྱོ་སི་སི་སྦེ་ མི་མཐོང་ནི་གི་དོན་ལུ་ཨིན་མས།
