༉ ཐིམ་ཕུག་རྫོང་ཁག་ཁྲིམས་ཀྱི་འདུན་སར་ སྐུར་འདེབས་ཀྱི་རྩོད་གཞི་འདི་ནང་ ད་རིས་ སྒེར་གྱི་མི་ངོམ་ཅིག་ཨིན་མི་ དཔལ་འབྱོར་གྱིས་ བཤེར་ལེན་ཕུལ་ཡོདཔ་ཨིན།
རྒྱལ་གཞུང་འབྲུག་གི་འགག་སྡེ་གིས་ ཁོ་ལུ་ མི་སྡེ་བརྡ་བརྒྱུད་ནང་ རྩོད་དཔོན་ཡོངས་ཁྱབ་ཡིག་ཚང་ལུ་ སྐུར་འདེབས་འབད་ཡོད་པའི་ ཉེས་འཛུགས་བཀོད་དེ་ཡོདཔ་ཨིན་མས།
ད་རིས་ དཔལ་འབྱོར་གྱིས་ བཤེར་ལེན་ཕུལ་མི་ནང་ ཁོ་གིས་ དུས་ཅི་ སྤྱི་ཟླ་ ༥ པའི་ སྤྱི་ཚེས་ ༤ གི་ཚེ་ འབྲུག་རྒྱང་བསྒྲགས་ལས་འཛིན་གྱིས་བཏང་ཡོད་མི་ གནས་ཚུལ་འདི་ མི་དམངས་ཀྱི་མཐའ་དོན་ལུ་ གསལ་བརྗོད་འབད་ཡོདཔ་མ་གཏོགས་ འདི་ནང་ལུ་ འགྱུར་བཅོས་ག་ནི་ཡང་ འབད་འབདཝ་མེདཔ་ལས་ ཁོ་ལུ་ ཉེས་འཛུགས་ཕོགས་དགོཔ་མེད་ཟེར་ཞུ་ཡི།
གནས་ཚུལ་འདི་ཡང་ འབྲུག་རྒྱལ་ཡོངས་དངུལ་ཁང་གི་ ལས་བྱེདཔ་༡༢ལུ་ ལག་ཁྱེར་རྫུས་མ་བཟོ་བའི་ ཉེས་པ་ལུ་བཙོན་ཁྲིམས་ལོ་༡ ཕོགས་ཡོད་མི་གི་སྐོར་ལས་ཨིན་མས།
རྒྱལ་གཞུང་འབྲུག་གི་འགག་སྡེ་གིས་ དཔལ་འབྱོར་ལུ་ ཉེས་འཛུགས་བཀོད་མི་དང་འཁྲིལཝ་ད་ དཔལ་འབྱོར་གྱིས་ ཁོ་རའི་ མི་སྡེ་བརྡ་བརྒྱུད་ ཕེསི་བུཀ་ནང་ལས་སྦེ་ བྱ་བ་འདི་ ཉེས་ལས་སྦོམ་ཤོས་ཅིག་ཨིནམ་སྦེ་ བྲིས་ནུག་ཟེར་ཨིན་མས།
ད་རུང་ དཔལ་འབྱོར་གྱིས་ དེ་བཟུམ་མའི་བྱ་བ་འདི་ ཉེན་ཁ་ཅན་དང་ ངན་ལྷད་སྦོམ་ཅིག་ཨིནམ་སྦེ་ བྲིས་ཏེ་འདུག་ཟེར་ཨིན་མས།
ཉེས་འཛུགས་ཚུ་དང་འཁྲིལཝ་ད་ མི་སྡེ་བརྡ་བརྒྱུད་ནང་ མ་བདེན་པའི་གཏམ་བྲིས་ཏེ་ ཁྱབ་སྤེལ་བཏང་མི་འདི་གིས་ མི་སྡེ་བརྡ་བརྒྱུད་འཆང་མི་ཚུ་གིས་ རྩོད་དཔོན་ཡོངས་ཁྱབ་ཡིག་ཚང་ལུ་ དམའ་ཕབ་དང་ མི་སེར་ཚུ་ལས་ ཡིག་ཚང་འདི་ལུ་ བློ་གཏད་དང་ཡིད་ཆེས་མེདཔ་འགྱོ་ནིའི་ ཉེན་ཁ་འཐོན་ཏེ་ཡོད་ཟེར་ཨིན་མས།
ད་རུང་ ཉེས་འཛུགས་འདི་ནང་ དཔལ་འབྱོར་གྱིས་ རྩོད་དཔོན་ཡོངས་ཁྱབ་ཡིག་ཚང་ལུ་ རྒྱལ་ཡོངས་ལས་མིའི་གླ་ཆ་ ཉུང་ཤོས་ལོ་༡ལས་ མཐོ་ཤོས་ལོ་༣གྱི་ གྱོང་འཐུས་རྩིས་རྐྱབ་སྟེ་ སྤྲོད་དགོ་པའི་ཞུ་བ་ཕུལ་ནུག
དཔལ་འབྱོར་གྱིས་འབད་བ་ཅིན་ དུས་ཅི་ སྤྱི་ཟླ་༥པའི་ནང་ རྩོད་དཔོན་ཡོངས་ཁྱབ་ཡིག་ཚང་གིས་ ཁོ་ལུ་ ཁྲིམས་ཀྱི་ངོས་ལེན་འབད་བའི་ཤུལ་ འཛིན་བཟུང་འབད་དེ་ ཉིནམ་༡༦གི་རིང་ ཁྲིམས་སྲུང་དོ་དམ་འོག་ལུ་ བཞག་ཡོདཔ་ཨིན་མས།
ཤུལ་ལས་ ཁྲིམས་ཀྱི་འདུན་ས་ལས་ རྩོད་གཞི་འདི་ ཆ་མེད་བཏང་ཡོདཔ་ཨིན་མས།
ད་རིས་ བཤེར་ལེན་ཕུལ་བའི་སྐབས་ དཔལ་འབྱོར་གྱིས་ ཁོ་ར་ འཛིན་བཟུང་འབད་དེ་ དོ་དམ་འོག་ལུ་བཞག་ཡོད་མི་ལུ་ རྒུད་འཐུས་འཐོབ་དགོ་ཟེར་ཞུ་ཡི།
ཚེ་རིང་བཟངམོ། གནས་ཚུལ་བསྡུ་ལེན་པ། ཐིམ་ཕུག
