གཟའ་པ་སངས། ༢༠༢༠ ཟླ་༧ པའི་སྤྱི་ཚེས་༢

སྐྱིད་སྡུག་གསོ་བའི་སྡེ་ཚན་ སྤ་རོ་ལུ་ཡོདཔ།

སྤྱི་ཟླ་༦ པའི་ཚེས་ ༢༩ ༢༠༢༠

༉ ཨ་རྟགས་འབད་བ་ཅིན་ རྒྱལ་ཁབ་ཀྱི་ས་གནས་ཁག་ཚུ་ནང་ལས་ཕར་འགྱོ་ཞིན་ན་ མི་ཚུ་ལུ་གསོ་བའི་ཞབས་ཏོག་བྱིན་མི་ མི་དབང་མངའ་བདག་རིན་པོ་ཆེ་མཆོག་གི་ སྐྱིད་སྡུག་གསོ་བའི་སྡེ་ཚན་འདི་ ད་རེས་སྐབས་ཅིག་ སྤ་རོ་སྨན་ཁང་ནང་ལུ་ གཞི་ཆགས་ཏེ་སྡོད་ནུག

སྡེ་ཚན་འདི་ ག་དེམ་ཅིག་སྦེ་ རྒྱལ་ཁབ་ནང་ལུ་ ནད་ཡམས་ ཀོ་ཝིཌ་-19 གི་ གནས་སྟངས་ སྐྱོ་སུ་འགྱོ་བ་ཅིན་ རྒྱབ་རྟེན་གྱི་གསོ་བའི་སྡེ་ཚན་སྦེ་ བཞག་བཞགཔ་ཨིན་མས།

ཨིན་རུང་ ཟླཝ་༢་དེ་ཅིག་གི་ནང་འཁོད་ སྡེ་ཚན་འདི་གིས་ ནདཔ་སྟོང་ཕྲག་ཕྱེད་ད་༤་ལྷགཔ་ཅིག་ལུ་ གསོ་བའི་ཞབས་ཏོག་ཚུ་བྱིན་ནུག

རྒྱལ་ཁབ་ནང་འཁོད་ལུ་ ག་དེམ་ཅིག་སྦེ་ ནད་ཡམས་ ཀོ་ཝིཌ-19 ཁྱབ་སྤེལ་འགྱོ་སྟེ་ འཇིགས་མེད་རྡོ་རྗེ་དབང་ཕྱུག་རྒྱལ་ཡོངས་གཙོ་བསྟེན་སྨན་ཁང་འདི་ དལ་ཁོམས་མེདཔ་སྦེ་འཐོན་སོང་པ་ཅིན་ མི་ཚུ་ལུ་ དུས་རྒྱུན་གྱི་གསོ་བའི་ཞབས་ཏོག་འདི་ སྐྱིད་སྡུག་གསོ་བའི་སྡེ་ཚན་གྱིས་བྱིན་ནི་ཨིན་མས།

སྡེ་ཚན་འདི་ ཡང་ཅིན་ཐིམ་ཕུག་ལུ་སྤོ་ནི་ཨིནམ་དང་ དེ་མེན་པ་ཅིན་ སྤ་རོ་ལུ་ར་སྡོད་ནི་ཨིན་མས།

སྡེ་ཚན་འདི་ནང་ལུ་ མཁས་མཆོག་༥་རྩིས་ཏེ་ འཐུས་མི་༡༥་ཡོདཔ་ད་ མཁས་མཆོག་ཚུ་ཡང་ མོ་ནད་མཁས་མཆོག་དང་ གསོ་བའི་མཁས་མཆོག་ དེ་ལས་ ཨ་ལོའི་མཁས་མཆོག་དང་ གཤག་བཅོས་མཁས་པ་ རུས་ཚིག་མཁས་པ་ཚུ་ཨིནམ་ད་ སྡེ་ཚན་འདི་ལུ་ གཤག་བཅོས་ཀྱི་རྒྱབ་རྟེན་སྡེ་ཚན་གཅིག་ཡང་ཡོདཔ་ཨིན་མས།

སྤ་རོ་ལུ་སྡོད་པའི་རིང་ སྡེ་ཚན་འདི་གིས་ ད་ལྟོ་ཚུན་ཚོད་ གཤག་བཅོས་༢༠༠་དེ་ཅིག་ འགོ་འདྲེན་འཐབ་ནུག

ད་རེས་ སྡེ་ཚན་འདི་ སྤ་རོ་ལུ་ཡོད་མི་དང་འབྲེལ་ སྤ་རོ་ལུ་སྡོད་མི་ཚུ་གིས་ཡང་ གོ་སྐབས་ལེན་ཏེ་སྦེ་ གསོ་བའི་ཞབས་ཏོག་ཚུ་ ལེན་དོ་ཡོདཔ་ཨིན་མས།

སྡེ་ཚན་འདི་གིས་ ནད་ཡམས་ཀྱི་བྱེལཝ་ མཇུག་མ་བསྡུ་ཚུན་ཚོད་ ད་རེས་ཀྱི་འགན་ཁུར་འདི་ འབག་སྟེ་སྡོད་ནི་ཨིནམ་ད་ གནས་སྟངས་འདི་ ཨ་རྟག་ཧ་ལུགས་འགྱོ་ཞིནམ་ལས་ སྡེ་ཚན་འདི་གིས་ ཧེ་མ་བཟུམ་སྦེ་ར་ རྒྱལ་ཁབ་ཀྱི་ས་གནས་ཁག་ཚུ་ནང་ལས་འགྱོ་ཞིན་ན་ གསོ་བའི་ཞབས་ཏོག་ཚུ་བྱིན་ནི་ཨིན་མས།

མི་དབང་མངའ་བདག་རིན་པོ་ཆེ་མཆོག་གི་ སྐྱིད་སྡུག་གསོ་བའི་སྡེ་ཚན་འདི་ རྒྱལ་ས་ལས་ ས་ཐག་རིང་ས་སྡོད་མི་ མི་ཚུ་ལུ་ གསོ་བའི་མཁས་མཆོག་གི་ཞབས་ཏོག་ཚུ་ འཐོབ་ཚུགསཔ་སྦེ་བཟོ་ཐབས་ལུ་ མི་དབང་མངའ་ཞབས་མཆོག་གི་ བཀའ་རྒྱ་གནངམ་བཞིན་དུ་ སྤྱི་ལོ་༢༠༠༩་ལུ་ གཞི་བཙུགས་འབད་ཡོདཔ་ཨིན།