༉ ཨེ་ཤི་ཡ་གོང་འཕེལ་དངུལ་ཁང་གིས་ སྤྱི་ལོ་ ༢༠༢༤ ལས་ ༢༠༢༨ ཚུན་ ལོ་ ༥ གི་དོན་ལུ་ རྒྱལ་ཁབ་མཉམ་འབྲེལ་གྱི་ ཐབས་བྱུས་གསརཔ་ཅིག་ འགོ་བཙུགས་ཏེ་འདུག
འཕྲལ་ཁམས་གཅིག་ཁར་ གསལ་བསྒྲགས་འབད་མི་ ཐབས་བྱུས་གསརཔ་འདི་ཡང་ རྒྱལ་ཁབ་ཀྱི་དཔལ་འབྱོར་ཡར་དྲག་གཏང་ནི་ནང་ སྟབས་མ་བདེཝ་ཡོད་མི་ཚུ་ སེལ་ནི་གི་དམིགས་གཏད་བསྐྱེདཔ་ཨིན་མས།
ཐབས་བྱུས་གསརཔ་འདི་ཡང་ མི་མང་འཛིན་སྐྱོང་ལས་སྡེ་དང་ སྒེར་སྡེ་གོང་འཕེལ་ དེ་ལས་ མི་སྟོབས་གོང་འཕེལ་གྱི་གནད་དོན་གཙོ་བོ་ ༣ ལུ་ གཙོ་རིམ་བཟུང་སྟེ་བརྩམས་ནུག
ད་རུང་ ཐབས་བྱུས་འདི་ནང་ གནམ་གཤིས་འགྱུར་བའི་ཐབས་ལམ་དང་ རང་བཞིན་གྱི་རྐྱེན་ངན་ཚུ་ལས་ བཀག་ནི་གི་དོན་ལུ་ རང་བཞིན་དང་མཐུན་པའི་ ཐབས་ལམ་ཚུ་གི་སྐོར་ལས་ཡང་ ཚུད་དེ་ཡོདཔ་ཨིན་མས།
ཐབས་བྱུས་འདི་ལས་བརྟེན་ ལོ་ལྔའི་འཆར་གཞི་ ༡༣ པ་ལུ་ ལྷན་ཐབས་འབྱུང་ནི་ཨིན་མས།
འབྲུག་རྒྱལ་ཁབ་ཀྱིས་ ཧེ་མའི་ལོ་ངོ་ ༢༠ གི་ནང་འཁོད་ དབུལ་ཕོངས་མར་ཕབ་འབད་ནི་དང་ གསོ་བ་དང་ཤེས་རིག་ཡར་དྲག་གཏང་ནི་གི་ཐད་ཁར་ གྲུབ་འབྲས་སྦོམ་སྦེ་ར་བཏོན་ཏེ་ཡོདཔ་ཨིན་མས།
འདི་གིས་སྦེ་ འབྲུག་རྒྱལ་ཁབ་འདི་ ན་ཧིང་ སྤྱི་ཟླ་ ༡༢ པའི་ནང་ གོང་འཕེལ་ཉུང་སུ་གི་གནས་རིམ་ནང་ལས་ མཐར་འཁྱོལ་ཡོད་རུང་ དཔལ་འབྱོར་གྱི་གནས་སྟངས་མར་ཕབ་འགྱོ་མི་དང་ ན་གཞོན་ལཱ་གཡོག་མེད་པའི་ཚད་གཞི་འདི་ མཐོ་སུ་སྦེ་ར་ཡོདཔ་ཨིན་མས།
ཨེ་ཤི་ཡན་གོང་འཕེལ་དངུལ་ཁང་འདི་ སྤྱི་ལོ་ ༡༩༦༦ ལུ་ གཞི་བཙུགས་འབད་ཡོདཔ་ད་ འདི་ཡང་ འཐུས་མི་རྒྱལ་ཁབ་ ༦༨ ཡོདཔ་ཨིན་མས།
དངུལ་ཁང་འདི་གིས་ ཨེ་ཤི་ཡ་དང་པེ་སི་ཕིག་ལུང་ཕྱོགས་ཚུ་ནང་ དབུལ་ཕོངས་རྩ་མེད་གཏང་ནི་ལུ་ ཁས་བླངས་འབདཝ་ཨིན་མས།
