༉ ཐིམ་ཕུག་གི་ལོ་བསྟར་ཚེས་བཅུ་ཉིནམ་གཉིས་པའི་ནང་ ཚེས་བཅུ་མཇལ་མི་ མི་སྟོང་ཕྲག་ལས་བཅད་དེ་འཛོམས་ནུག
ཚེས་བཅུ་མཇལ་མི་ཚུ་གི་གྲལ་ལས་ གཅིག་ སྐྱེས་ལོ་ ༩༥ ལང་མི་ ཨཔ་སངས་རྒྱས་ཨིནམ་ད་ ཁོ་རང་ ལོ་ན་རྒས་ཏེ་འབད་རུང་ ད་ལྟོའི་བར་ན་ཡང་ ཚེས་བཅུ་འདི་ དད་པ་དང་ཡིད་ཆེས་བསྐྱེད་དེ་ མ་ཆད་པ་རང་ མཇལ་བར་འགྱོ་དོ་ཡོདཔ་ཨིན་མས།
ཐིམ་ཕུག་ དཀར་སྦི་ས་ལས་ཨིན་མི་ སངས་རྒྱས་ཀྱིས་ དྲོ་པ་ལས་རང་ ཏོག་མ་བཙུགས་སྦེ་ བུ་དང་གཅིག་ཁར་ བྱིན་རླབས་ཅན་གྱི་ཚེས་བཅུ་འདི་ མཇལ་བར་འགྱོ་དོ་ཡོདཔ་ད་ ཁོ་ལུ་ ཨ་ལུ་བདུན་ཡོདཔ་ཨིན་མས།
ཁོ་གིས་སླབ་མི་ནང་ ཧེ་མ་འབད་བ་ཅིན་ ཐིམ་ཕུག་ཚེས་བཅུ་གི་སྐབས་ལུ་ སྐུ་འཆམ་ཚུ་མཇལ་ཁ་གནངམ་མ་གཏོགས་ ད་རེས་བཟུམ་སྦེ་ རང་ལུགས་ཀྱི་གླུ་གཞས་ཚུ་ སྤྱན་འབུལ་ཞུ་སྲོལ་མེད་ཟེར་བཤད་ཅི།
ད་རུང་ ཁོ་གིས་བཤད་མི་ནང་ ཚེས་བཅུ་འདི་ནང་ མི་ག་ར་ གཅིག་ཁར་འཛོམས་དོ་ཡོདཔ་ལས་ འབྲུག་མི་ཚུ་གི་བར་ན་ མཐུན་ལམ་དང་མཉམ་འབྲེལ་ཚུ་ སྒྲིང་སྒྲིང་ཡོད་པའི་ བརྡ་མཚན་བཏོན་མས་ཟེར་ཨིན་མས།
ཨཔ་སངས་རྒྱས་བཟུམ་སྦེ་རང་ མི་ཚུ་གིས་ ཚེས་བཅུ་འདི་ དད་པ་དང་ཡིད་ཆེས་བསྐྱེད་དེ་ མཇལ་བར་འོང་དོ་ཡོདཔ་ལས་ ཚེས་བཅུ་གི་སྲོལ་འདི་ ཡོངས་གྲགས་ཅན་ཅིག་སྦེ་ར་ བརྩི་སྲུང་ཞུ་དོ་ཡོདཔ་ཨིན་མས།
ཨཔ་སངས་རྒྱས་ཀྱིས་སླབ་མི་ནང་ ཐིམ་ཕུག་ཚེས་བཅུ་འདི་ ཁོ་རང་མ་ཤི་ཚུན་ཚོད་རང་ མཇལ་བར་འོང་ནི་སྦེ་ཡོད་ཟེར་བཤད་ཅི།
ཚེས་བཅུ་ཉིནམ་ ༢ པའི་ནང་ བྱིན་རླབས་ཅན་གྱི་ རཀྴ་དམངས་འཆམ་དང་གཅིག་ཁར་ དུར་བདག་དང་གཏུམ་རྔམ་གྱི་སྐུ་འཆམ་ཚུ་ མཇལ་ཁ་གནང་ནུག
