༉ བསམ་གྲུབ་ལྗོངས་མཁར་ ཝང་ཕུག་རྒེད་འོག་ནང་ ལྕགས་བཟོ་གི་ལཱ་འབད་མི་འདི་ ཉམས་འགྱོ་དོ་ཡོདཔ་ལས་ ད་རེས་ རྒེད་འོག་འདི་ནང་ ལྕགས་བཟོ་གི་ལཱ་འབད་མི་ གཅིག་ལས་བརྒལ་མེདཔ་ཨིན་མས།
སྐྱེས་ལོ་ ༦༤ ལང་མི་ གྲུབ་པ་གིས་ འབྲུག་པའི་ལམ་སྲོལ་འདི་ ཉམས་སྲུང་འབད་དོ་ཡོདཔ་མ་ཚད་ ལྕགས་བཟོ་འདི་ལས་བརྟེན་ འོང་འབབ་ཡང་ ཨོ་ཏོག་ཏོ་སྦེ་བཟོ་ཚུགས་ཏེ་འདུག
འདི་ཡང་ ཁོ་གིས་ ཧེ་མའི་ལོ་ ༢༠ དེ་ཅིག་གི་རིང་ ལག་བཟོ་འདི་ལས་བརྟེན་ ཟླཝ་རེ་ནང་ འོང་འབབ་དངུལ་ཀྲམ་སྟོང་ཕྲག་ ༣༠ ལས་ ༤༠ དེ་ཅིག་གི་བར་ན་ བཟོ་ཚུགས་ཏེ་ཡོདཔ་ཨིན་མས།
ས་གནས་ཀྱི་མི་ཚུ་ལུ་ སོ་ནམ་གྱི་ལག་ཆས་ཚུ་ཐོབ་ནི་ནང་ ལཱ་ཁག་གཏང་དོ་ཡོདཔ་ལས་ གྲུབ་པ་གིས་ མང་ཤོས་ཅིག་རང་ སོ་ནམ་གྱི་ལག་ཆས་ཚུ་བརྡུངས་དོ་ཡོདཔ་ཨིན་མས།
འདི་གིས་སྦེ་ གཡུས་ཁའི་མི་ཚུ་ལུ་ སོ་ནམ་གྱི་ལག་ཆས་ཚུ་ གོང་མཐོ་སུ་སྦེ་སྤྲོད་དེ་ ཕྱི་ལས་ནང་འདྲེན་འབད་མ་དགོ་པར་ ཕན་ཐོགས་ཏེ་ཡོདཔ་ལས་ གྲུབ་པ་གི་ལཱ་ལུ་ དགའ་ཚོར་སྦོམ་སྦེ་བསྐྱེདཔ་ཨིན་མས།
གྲུབ་པ་གིས་སླབ་མི་ནང་ ན་གཞོན་ཚུ་གིས་ ལམ་སྲོལ་འདི་ལྷབ་ནི་ལུ་ སྤྲོ་བ་དང་དང་འདོད་མི་བསྐྱེད་དོ་ཡོདཔ་ལས་ ལྕགས་བཟོའི་རིག་རྩལ་འདི་ ཉམས་མི་འགྱོ་ག་མནོ་བའི་ ཚ་གྱང་ཡོད་ཟེར་བཤད་ཅི།
གྲུབ་པ་གིས་ སོ་ནམ་གྱི་ལག་ཆས་ཚུ་གིས་མ་དོ་བར་ གཟར་རུ་དང་ཟན་སྐྱ་ཚུ་རྩིས་ཏེ་ ཐབ་ཆས་ཚུ་ཡང་ བརྡུངས་དོ་ཡོདཔ་ཨིན་མས།
མཇུག་ལས་མཇུག་སུ་ རྒེད་འོག་འདི་ནང་ ལྕགས་བཟོའི་ལཱ་འབད་མི་འདི་ ག་དེ་སྦེ་འོང་ག་སླབ་མི་ཤེས་དོ་ཡོད་རུང་ ད་རེས་ གྲུབ་པ་གིས་ ལཱ་འདི་ལས་བརྟེན་ འཚོ་བའི་སྐྱོང་དོ་ཡོད་པའི་ཁར་ ལག་བཟོའི་ལམ་སྲོལ་འདི་ཡང་ ཉམས་སྲུང་འབད་དེ་ བཞག་ཚུགས་ཏེ་འདུག
