༉ མི་དབང་མངའ་བདག་རིན་པོ་ཆེ་གིས་ ད་རིས་ལས་ ལྷོ་ཕྱོགས་རྫོང་ཁག་ཚུ་ནང་ལས་ཕར་ ཆིབས་སྐྱོད་གནང་དོ་ཡོདཔ་ཨིན།
མི་དབང་མངའ་ཞབས་མཆོག་གིས་ ད་ས་དྲོ་པ་ དབང་འདུས་ཕོ་བྲང་ བསྟན་སྐྱོང་གླིང་ལུ་ བདེ་སྲུང་སྦྱོང་བརྡར་ཤོ་ཐེངས་ ༤༦ པའི་ནང་ བཅའ་མར་གཏོགས་མི་ཚུ་ལུ་ མཇལ་འཕྲད་གནང་ནུག
འདི་བཟུམ་སྦེ་ མི་དབང་མངའ་བདག་རིན་པོ་ཆེ་གིས་ ཆིབས་སྐྱོད་གནང་པར་མ་འབྱོན་པའི་ཧེ་མ་ གླིང་ཀ་ན་ཕོ་བྲང་ནང་ལུ་སྦེ་ ད་སའི་གི་ཊི་ཀ་གནང་ཡི།
མི་དབང་མངའ་ཞབས་མཆོག་གིས་ ཐུགས་སྨོན་གནང་མི་ ཊི་ཀ་ཚུ་ཡང་ རྒྱལ་ཁབ་ནང་འཁོད་ལུ་ བཀྲམ་ནི་གི་དོན་ལས་ རྫོང་ཁག་ག་རའི་ནང་ལས་ཕར་ བཏང་ཡོདཔ་ཨིན་མས།
ད་སའི་གི་དུས་སྟོན་འདི་ཁར་ ཧིན་དུའི་ཆོས་ལུགས་འཛིན་མི་ཚུ་གིས་ ཊི་ཀ་ཚུ་བརྗེ་སོར་འབད་དོ་ཡོདཔ་ད་ ཊི་ཀ་འདི་ཡང་ དངོས་གྲུབ་དང་ཐུགས་སྨོན་གྱི་རྟགས་མཚན་ལུ་ ཁོང་རའི་ནང་མི་རྒས་ཤོས་ཚུ་གིས་ གཞོནམ་ཚུ་ལུ་སྦྱར་དོ་ཡོདཔ་ཨིན།
མི་དབང་མཆོག་གིས་ ད་སའི་གི་ཊི་ཀ་འདི་ དུས་སྟོན་ཨ་རྟག་རང་གནང་དོ་ཡོདཔ་ད་ འདི་གིས་ རྒྱལ་ཁབ་གཅིག་དང་ མི་སེར་གཅིག་ཨིན་པའི་ བརྡ་མཚོན་བཏོན་ཨིན་མས།