འབྲུག་རྒྱལ་ཁབ་ཀྱིས་ ཡུན་བརྟན་གོང་འཕེལ་གྱི་དམིགས་དོན་ཚུ་ ཧ་སུ་ཅིག་སྦེ་ གྲུབ་ཚུགས་པའི་རེ་བ།

སྤྱི་ཟླ་༩ པའི་ཚེས་ ༢༧ ༢༠༡༩

༉ བློན་ཆེན་ དྲོག་ཊར་ བློ་གྲོས་ཚེ་རིང་གིས་ འཛམ་གླིང་སྤྱི་ཚོགས་ཀྱི་ཡོངས་ཁྱབ་ཞལ་འཛོམས་ ཐེངས་༧༤་པའི་ནང་ ཡུན་བརྟན་གོང་འཕེལ་དམིགས་དོན་གྱི་ཐོག་ལུ་ དབུ་འཁྲིད་ཞལ་འཛོམས་ཚོགས་པའི་སྐབས་ལུ་ གསལ་ཞུ་འབད་མི་དང་འཁྲིལཔ་ད་ འབྲུག་རྒྱལ་ཁབ་ཀྱིས་ ཡུན་བརྟན་གོང་འཕེལ་གྱི་དམིགས་དོན་ཚུ་ ངེས་གཏན་བཟོ་ཚར་ཏེ་ཡོད་པའི་ཁར་ རྒྱལ་ཡོངས་ཀྱི་ལས་རིམ་མ་འདྲཝ་ཚུ་ཡང་ བརྩམ་ཚར་ཏེ་ཡོདཔ་ལས་ དམིགས་དོན་གྲུབ་ཚུགས་མི་ རྒྱལ་ཁབ་འགོ་དང་པ་ཅིག་ འཐོན་ཚུགས་པའི་རེ་བ་ཡོདཔ་སྦེ་ཨིན་མས།

ཡུན་བརྟན་གོང་འཕེལ་གྱི་དམིགས་དོན་ཚུ་ཡང་ མ་འོངས་ཡུན་བརྟན་གྱི་གཞི་འགྱམ་ རྩ་གཏན་སྦེ་འབྱུང་ཚུགས་པའི་ གཞི་རྩ་མེད་ཐབས་མེདཔ་ཅིག་ཨིན་མས།

དམིགས་དོན་ཚུ་ཡང་ སྤྱི་ལོ་༢༠༡༥་ལུ་ འཛམ་གླིང་སྤྱི་ཚོགས་ཡོངས་ཁྱབ་ཞལ་འཛོམས་ཚོགས་པའི་སྐབས་ལུ་ སྤྱི་ལོ་༢༠༣༠་ལུ་གྲུབ་ནི་གི་དོན་ལས་ བཟོ་ཡོདཔ་ཨིན་མས།

ད་རུང་ བློན་ཆེན་གིས་འབད་བ་ཅིན་ འབྲུག་རྒྱལ་ཁབ་ནང་ལུ་ རྒྱལ་ཡོངས་དགའ་སྐྱིད་དཔལ་འཛོམས་འདི་ དངོས་ཅན་དང་དངོས་མེད་ཀྱི་བརྩི་མཐོང་ཚུ་ འདྲ་མཉམ་བཟོ་སྟེ་ དགའ་སྐྱིད་འབྱུང་ཐབས་ཀྱི་དོན་ལུ་ ཁྱད་དུ་འཕགས་པའི་ གཞི་རྩ་ངོ་མ་ཅིག་འབདཝ་ལས་ ཡུན་བརྟན་གོང་འཕེལ་གྱི་དམིགས་དོན་ཚུ་ འགོ་མ་བཙུགས་པའི་ཧེ་མ་ལས་ རྒྱལ་ཡོངས་དགའ་སྐྱིད་དཔལ་འཛོམས་ཀྱི་ལྟ་བ་འདི་ གྲུབ་སྟེ་ཡོདཔ་སྦེ་གསལ་ཞུ་འབད་ཡི།

འདི་འབདཝ་ལས་ བློན་ཆེན་གྱིས་གསུང་མི་ནང་ རྒྱལ་ཁབ་ནང་ལུ་ ཧེ་མ་ལས་རང་ རྒྱལ་ཡོངས་དགའ་སྐྱིད་དཔལ་འཛོམས་ཀྱི་ལྟ་བ་འདི་ ལག་ལེན་འཐབ་སྟེ་ཡོདཔ་ལས་ འབྲུག་རྒྱལ་ཁབ་ཀྱི་དོན་ལུ་ ཡུན་བརྟན་གོང་འཕེལ་གྱི་དམིགས་དོན་ཚུ་གྲུབ་ནི་ནང་ལུ་ དཀའ་ངལ་མེད་ཟེར་ཨིན་མས།

འདི་བཟུམ་སྦེ་ བློན་ཆེན་གྱིས་ཞུ་མི་ནང་ མི་དབང་མངའ་བདག་རིན་པོ་ཆེ་མཆོག་གིས་ མི་སྡེའི་འདྲམ་གྱི་དོན་ལུ་ གསོ་བ་དང་ཤེས་རིག་ རིན་མེད་སྟོང་པ་སྦེ་གནང་བཞིན་ཡོད་མི་འདི་ཡང་ ཡུན་བརྟན་གོང་འཕེལ་དམིགས་དོན་གྱི་ལྟ་བ་ མི་ཁུངས་གཅིག་ཡང་ རྒྱབ་ཁར་བསྐྱུར་མི་བཞག་ནི་སྦེ་ཡོད་མི་དང་ རྟགས་མཐུན་པའི་བརྡ་མཚོན་ཅིག་ཨིན་ཟེར་གསུང་ནུག

བློན་ཆེན་གྱིས་གསུང་མི་ནང་ འབྲུག་རྒྱལ་ཁབ་ནང་ལུ་ དུས་ཅི་ སྤྱི་ཟླ་༦་པའི་ནང་ལས་ ཞི་གཡོགཔ་གཞན་མི་ཚུ་དང་འཕྱདཔ་ད་ སློབ་དཔོན་གྱི་ཁྱད་རིག་འདི་ དངུལ་ཕོག་ཆེ་བའི་ ཁྱད་རིག་གི་ལཱ་ཅིག་སྦེ་བཟོ་བའི་ཤུལ་ལུ་ ཁོང་ཆ་ཁྱབ་ལུ་ དངུལ་ཕོག་བརྒྱ་ཆ་༧༥་དེ་ཅིག་གིས་རྩིས་ ཡར་སེང་འབད་མི་འདི་གིས་ ད་རེས་ ཕྱག་ཞུ་བའི་བསྒང་ཡོད་མི་ སློབ་དཔོན་ཚུ་ལུ་ སེམས་ཤུགས་ཐོབ་ཚུགས་པའི་ རེ་བ་ཡོདཔ་མ་ཚད་ མ་འོངས་པའི་ནང་ལུ་ཡང་ ཁྱད་རིག་འདི་ནང་ ལཱ་འབད་ནི་སྦེ་ བློ་སྟོབས་སྐྱེད་བཅུག་ནི་ནང་ལུ་ ལྷན་ཐབས་འབྱུང་འོང་ཟེར་ཨིན་མས།

འདི་བཟུམ་གྱི་ལས་འཆར་ཚུ་བརྒྱུད་དེ་ ཁོ་གི་རྩིས་ལས་འབད་བ་ཅིན་ ཡུན་བརྟན་གོང་འཕེལ་གྱི་དམིགས་དོན་བ་ལྷགཔ་སྦེ་ རྩ་གཏན་འབྱུང་ཚུགས་པའི་ བློ་སྟོབས་ཡོདཔ་སྦེ་གསུང་ཡི།

འདི་མ་ཚད་ འཛམ་གླིང་སྤྱི་ཚོགས་ཀྱིས་རྒྱབ་སྣོན་བཀོད་མི་དང་འཁྲིལ་ཏེ་ ད་རེས་ འབྲུག་རྒྱལ་ཁབ་ནང་ལུ་ ཡུན་བརྟན་གོང་འཕེལ་དམིགས་དོན་གྱི་ལས་དོན་ཚུ་ ལྟ་རྟོག་འབད་ནི་གི་དོན་ལས་ སྤྱི་ཚོགས་ཀྱི་ཚོགས་ཆུང་ཅིག་ཡང་ བཟོ་སྟེ་ཡོད་ཟེར་ཞུ་ཡི།

འདི་བཟུམ་སྦེ་ བློན་ཆེན་གྱིས་ ཡུན་བརྟན་གྱི་གོང་འཕེལ་གྱི་དམིགས་དོན་༡༧་པ་འདི་ ཡུན་བརྟན་གོང་འཕེལ་གྱི་དོན་ལུ་ རྒྱལ་སྤྱིའི་མཉམ་འབྲེལ་ རྩ་གཏན་བཟོ་དགོཔ་སྦེ་ཡོད་མི་གི་ཐོག་ལུ་ གཙོ་རིམ་བཟུང་སྟེ་སྦེ་ གསལ་ཞུ་གནང་ཡི།

འདི་དང་གཅིག་ཁར་ བློན་ཆེན་གྱིས་ འབྲུག་རྒྱལ་ཁབ་འདི་ སྤྱི་ལོ་༢༠༢༣་ལུ་ གོང་འཕེལ་ཉུང་སུ་ཅིག་སྦེ་འགྱོ་བའི་ རྒྱལ་ཁབ་ནང་ལས་ མཐར་འཁྱོལ་ནི་ཨིན་མི་དང་བསྟུན་ ཡུན་བརྟན་གོང་འཕེལ་གྱི་དམིགས་དོན་ཚུ་ གྲུབ་ནི་གི་དོན་ལས་ རྒྱལ་སྤྱིའི་མཉམ་འབྲེལ་འདི་ དགོཔ་ཁག་ཆེ་ཟེར་གསུང་གནང་ནུག

ཡུན་བརྟན་གོང་འཕེལ་དམིགས་དོན་གྱི་ དབུ་འཁྲིད་ཞལ་འཛོམས་འདི་ཡང་ འཛམ་གླིང་སྤྱི་ཚོགས་ཀྱིས་ གཟའ་ལྷགཔ་དང་ཕུརཔ་ལུ་ནིའུ་ཡོག་ལུ་ཡོད་པའི་ འཛམ་གླིང་སྤྱི་ཚོགས་ཀྱི་ ཡིག་ཚང་ལྟེ་བའི་ནང་སྦེ་ འགོ་འདྲེན་འཐབ་ཅི།

ཞལ་འཛོམས་འདི་ཡང་ འཛམ་གླིང་རྒྱལ་ཁབ་ཚུ་གི་ དབུ་འཁྲིདཔ་ཚུ་ གཅིག་ཁར་འཛོམས་ཏེ་ སྤྱི་ལོ་༢༠༣༠་གི་ ཡུན་བརྟན་གོང་འཕེལ་གྱི་དམིགས་དོན་དང་ དམིགས་དོན་༡༧་པ་འདི་ གྲུབ་ནི་གི་དོན་ལས་ ཐབས་ལམ་དང་ལས་འཆར་ཚུ་ངོས་འཛིན་འབད་ནི་གི་དོན་ལས་ འགོ་འདྲེན་འཐབ་ནུག