འབྲུག་དང་ཐའི་ལེནཌ་གི་བར་ན་ ལྟ་བཤལ་ནང་ལཱ་འབད་མི་སྡེ་ཚན་གྱི་ཞལ་འཛོམས།

སྤྱི་ཟླ་༩ པའི་ཚེས་ ༢༧ ༢༠༡༩

༉ ད་རིས་ ཐིམ་ཕུག་ལུ་སྦེ་ འབྲུག་ལྟ་བཤལ་ཚོགས་སྡེ་དང་ ཐའི་ལེནཌ་གི་ལྟ་བཤལ་དབང་འཛིན་གཉིས་ཀྱི་བར་ན་ ལྟ་བཤལ་ནང་ལཱ་འབད་མི་སྡེ་ཚན་གྱི་ཞལ་འཛོམས་ཅིག་ འགོ་འདྲེན་འཐབ་ནུག

ཞལ་འཛོམས་འདི་ཡང་ ལས་སྡེ་འདི་༢་ཀྱིས་ སྤྱི་ལོ་༢༠༡༧་ལུ་ འབྲུག་དང་ཐའི་ལེནཌ་རྒྱལ་ཁབ་ཀྱི་བར་ན་ ལྟ་བཤལ་ཡར་དྲག་བཏང་ནི་དོན་ལུ་ གོ་བརྡའི་ཆིངས་ཡིག་གུ་ མཚན་རྟགས་བཀོད་དེ་ཡོད་མི་འདི་ བསྐྱར་ཞིབ་འབད་ནི་གི་དོན་ལུ་ འགོ་འདྲེན་འཐབ་སྟེ་ཡོདཔ་ཨིན།

ཞལ་འཛོམས་འདི་ནང་ལུ་ ཐའི་གི་འཐུས་མི་ཚབ་ཚུ་གིས་བཀོད་མི་ནང་ ཐའི་གི་མི་ཚུ་གིས་ འབྲུག་ལུ་ལྟ་སྐོར་ནང་འོང་མ་ཚུགས་མི་འདི་ཡང་ ནམ་གྲུའི་གླ་ཆ་མཐོ་མི་དང་ ལྟ་བཤལཔ་མང་སུ་སྦེ་འོང་བའི་དུས་ཚོད་ཁར་ འབྲུག་དང་ཐའི་ལེནཌ་ཐའི་གི་བར་ན་ གནམ་གྲུ་འཕུར་འགྲུལ་འབད་མི་འདི་ ཚད་ཅིག་ལས་བརྒལ་མེད་མི་ དེ་ལས་ སྐྱོད་ཐམ་བཟོ་ནི་ནང་ ལཱ་ཁག་བཏང་ནི་འདི་གིས་ཨིན་ཟེར་བཤད་ཅི།

འབྲུག་ལྟ་བཤལ་ལྟ་རྟོག་པ་དང་འཁྲིལཔ་ད་ ཐའི་གི་ལྟ་བཤལཔ་ཚུ་གིས་ འབྲུག་ལུ་ལྟ་སྐོར་ནང་འོང་མི་འདི་ ལོ་༡༠་དེ་ཅིག་ཧེ་མ་ ཡར་སེང་འགྱོ་སྟེ་ར་ཡོད་རུང་ སྤྱི་ལོ་༢༠༡༦་ལས་ ལྟ་བཤལཔ་འོང་མི་གི་གྱངས་ཁ་འདི་ དུམ་གྲ་རེ་མར་ཕབ་འགྱོ་ནི་ འགོ་བཙུགས་ཡོདཔ་སྦེ་ཨིན་མས།

ན་ཧིང་ རྒྱལ་ཁབ་ནང་ལུ་ ཐའི་ལེནཌ་རྒྱལ་ཁབ་ནང་ལས་ བལྟ་བཤལཔ་༣༩༠༠་མ་ལངམ་ཅིག་འོང་ཡོདཔ་ད་ ལོ་འདི་ནང་ར་ འབྲུག་མི་སྟོང་ཕྲག་༢༥་ལྷགཔ་ཅིག་གིས་ ཐའི་ལེནཌ་ལུ་ ལྟ་སྐོར་ནང་འགྱོ་ཡོདཔ་ཨིན་མས།

འདི་ལུ་ ཐའི་ལེནཌ་གི་བལྟ་བཤལ་དབང་འཛིན་ ཀོད་ཁྱབ་མདོ་ཆེན་ སི་རི་པཱོཎ་བྷི་ཀཱ་ནཱཎ་དྷ་ནཱ་གིས་སླབ་མི་ནང་ ཐའི་གི་མི་ཚུ་ འབྲུག་ལུ་འོང་ནི་གི་དོན་ལུ་ སྤྲོ་བ་གནམ་མེད་ས་མེད་ བསྐྱེད་དོ་ཡོད་རུང་ ཁོང་ཆ་ཁྱབ་ འབྲུག་ལུ་འོང་ནི་དོན་ལུ་ བརྡ་དོན་ཚུ་དེ་ཅིག་ར་ ཧ་མ་གོ་ནི་འདི་གིས་ཨིན་ཟེར་བཤད་ཅི།

འདི་འབད་ལས་ འབྲུག་དང་ཐའི་ལེནཌ་རྒྱལ་ཁབ་༢་ཆ་ར་ ནང་པའི་ཆོས་ལྡན་གྱི་རྒྱལ་ཁབ་ཅིག་འབདཝ་ལས་ ཐའི་བལྟ་བཤལཔ་ཚུ་གིས་ ལྷ་ཁང་ཚུ་མཇལ་བར་འགྱོ་ནང་ སྤྲོ་བ་བསྐྱེད་དོ་ཡོདཔ་ལས་ ལྷ་ཁང་ཚུ་ཡར་དྲག་བཏང་ཞིན་ན་ སེམས་ཤོར་སི་སི་སྦེ་ བཟོ་དགོཔ་འདུག་ཟེར་ཨིན་མས།

ད་རུང་ ཞལ་འཛོམས་འདི་ནང་ལུ་ སྟབས་མ་བདེ་བའི་གནད་དོན་ཚུ་གིས་མ་དོ་བར་ ཆིངས་ཡིག་ནང་ལུ་ཡོད་པའི་ གཞན་མི་ཐབས་ལམ་ཚུ་གི་སྐོར་ལས་ཡང་ གྲོས་བསྡུར་ཚུ་འབད་ཡི།

སྡེ་ཚན་༢་ཆ་རའི་ཧོངས་ལས་ མཉམ་འབྲེལ་གྱི་ཚོང་ལམ་དང་ ལྟ་བཤལ་གྱི་ཐོན་སྐྱེད་ལེགས་ཤོམ་ཚུ་ གདམ་ཁ་རྐྱབ་ནི་དང་ མི་སྡེ་གཞིས་ཆགས་ཀྱི་ལྟ་བཤལ་ཡར་དྲག་བཏང་ནི་གི་ ཐབས་ཤེས་ཚུ་གིས་སྐོར་ལས་ཡང་ གྲོས་བསྡུར་ཚུ་འབད་ནུག

འདི་བཟུམ་སྦེ་ ཡོངས་གྲགས་ཅན་གྱི་མི་ངོ་ཚུ་དང་ རྒྱལ་ཁབ་༢་ཀྱིས་ བརྡ་བརྒྱུད་ངོ་ཚབ་ཚུ་ཡང་ ལས་རིམ་ཚུ་ནང་གྲལ་གཏོགས་འབད་དེ་ ཡར་དྲག་བཏང་ནི་གི་དོན་ལས་ བཏང་ནི་སྦེ་ གྲོས་འཆར་ཚུ་བཀོད་དེ་འདུག

ད་རུང་ བཀོད་ཁྱབ་མདོ་ཆེན་གྱིས་སླབ་མི་ནང་ ཁོང་གི་ཁ་ཐུག་ལས་ འབྲུག་ལུ་ ལཱ་གཡོག་གི་སྦྱོང་བརྡར་ནང་ལུ་ གྲོགས་རམ་དང་ རྒྱབ་སྐྱོར་ཚུ་འབད་ནི་ལུ་ སེམས་དགའ་སྟེ་ཡོདཔ་སྦེ་ཨིན་མས།

འདི་མ་ཚད་ ཐའི་ལེནཌ་གི་བལྟ་བཤལ་དབང་འཛིན་ནང་ལས་ ལྟ་བཤལ་མཁས་མཆོག་ཚུ་ འབྲུག་པའི་ལྟ་བཤལ་ལས་སྡེ་ཚུ་དང་ ཟ་ཁང་ཚུ་ལུ་ ཚོང་ལམ་གྱི་ཉམས་མྱོང་ཚུ་གི་སྐོར་ལས་ བཤད་བྱིན་པར་བཏང་འོང་ཟེར་བཤད་ཅི།

འདི་དང་གཅིག་ཁར་ ཆིངས་ཡིག་གི་ཆ་ཤེས་ཅིག་སྦེ་ འབྲུག་ལྟ་བཤལ་ཚོགས་སྡེའི་འགོ་དཔོན་ཚུ་དང་ བལྟ་བཤལ་ལས་སྡེ་དང་ བརྡ་བརྒྱུད་ངོ་ཚབ་ཚུ་རྩིས་ཏེ་ འབྲུག་མི་སྡེ་ཚན་ཅིག་གིས་ ན་ཧིང་ ཐའི་ལེནཌ་ལུ་ལྟ་སྐོར་ནང་འགྱོ་ནུག

ལྟ་སྐོར་འགྱོ་མི་འདི་ཡང་ མི་སྡེ་གཞི་ཆགས་ཀྱི་ལྟ་བཤལ་དང་ འབྲུག་དང་ཐའི་ལེན་རྒྱལ་ཁབ་༢་ཀྱི་བར་ན་ ལྟ་བཤལ་ཡར་དྲག་བཏང་ནི་དོན་ལུ་ ཞིབ་འཇུག་ཚུ་འབད་བར་བཏང་ནི་ལུ་ དམིགས་གཏད་འགྱོ་ཡོདཔ་ཨིན་མས།