ཐིམ་ཕུག་ཁྲོམ་སྡེ་གིས་ ཕྱགས་སྙིགས་འཛིན་སྐྱོང་འཐབ་ནི་ལུ་ བལྟ་བའི་བསྒང་།

སྤྱི་ཟླ་༩ པའི་ཚེས་ ༢༧ ༢༠༡༩

༉ ཐིམ་ཕུག་ སྐལ་སྐྱིད་སློབ་གྲྭ་ཆེ་བ་གི་ འོག་ལུ་ཡོད་པའི་ ཕྱགས་སྙིགས་བསྡུ་ལེན་འབད་སའི་ལྟེ་བ་འདི་ མགྱོགས་པ་རང་ ཕྱགས་སྙིགས་ཕྱི་སེལ་རྐྱབ་སར་དང་ བསྐྱར་གསོ་འབད་སའི་ལས་ཚན་ཅིག་སྦེ་ བཟོ་ནི་ཨིན་མས།

འདི་ཡང་ ལྟེ་བ་འདི་ནང་ལུ་ རུལ་བཏུབ་དང་མ་བཏུབ་པའི་ ཕྱགས་སྙིགས་ཚུ་ག་རང་ སླ་བསྲེས་རྐྱབ་སྟེ་ བླུགས་དོ་ཡོདཔ་ལས་ ཕྱགས་སྙིགས་བསྡུ་ལེན་དང་ བསྐྱེལ་འདྲེན་ དེ་ལས་ བསྐྱར་གསོ་འབད་ནི་ནང་ལུ་ གདོང་ལེན་བྱུང་དོ་ཡོདཔ་ལས་ གནད་དོན་འདི་ སེལ་ཐབས་ལུ་དམིགས་ཏེ་ཨིན་མས།

ད་རེས་བཟུམ་ཅིག་འབད་བ་ཅིན་ ལྟེ་བ་འདི་ནང་ལུ་འབག་མི་ཕྱགས་སྙིགས་ཚུ་ འཕྲུལ་ཆས་ཀྱིས་མེན་པར་ ལགཔ་གིས་སྦེ་ ཕྱི་སེལ་རྐྱབ་དགོཔ་འཐོན་ནི་འདི་གིས་ ཐིམ་ཕུག་ཁྲོམ་སྡེའི་ནང་འཁོད་ལས་འཐོན་པའི་ ལྟོ་ལྷག་ཚུ་ ཕྱི་སེལ་མ་རྐྱབ་པར་ བཀོག་དགོཔ་འཐོན་ཏེ་འདུག

འདི་གི་དོན་ལུ་ ལས་འགུལ་འདི་ འགོ་བཙུགས་ནི་གི་དོན་ལས་ ཁ་ཙ་ ཐིམ་ཕུག་ལུ་སྦེ་ ཀཱོ་རི་ཡ་གི་སྔོ་ལྗངས་འཕྲུལ་རིག་ལྟེ་བ་དང་ རྒྱལ་ཡོངས་མཐའ་འཁོར་གནས་སྟངས་ལྷན་ཚོགས་ དེ་ལས་ ཐིམ་ཕུག་ཁྲོམ་སྡེ་༣་གྱི་བར་ན་ མཉམ་འབྲེལ་གྱི་ གྲོས་སྟོན་ཞལ་འཛོམས་ཅིག་ འགོ་འདྲེན་འཐབ་ཅི།

ཀཱོ་རི་ཡ་གི་སྔོ་ལྗངས་འཕྲུལ་རིག་ལྟེ་བ་གིས་རྒྱབ་སྐྱོར་འབད་དེ་ ཕྱགས་སྙིགས་བླུགས་སའི་ཧོད་ལས་འགོ་བཙུགས་ཏེ་ ཕྱགས་སྙིགས་ཕྱི་སེལ་དང་ བསྐྱར་གསོ་འབད་ནི་གི་འཕྲུལ་ཆས་ཚུ་ བཙུགས་ནི་ཨིན་མས།

མཐུན་རྐྱེན་ཚུ་ཡང་ ཟད་འགྲོ་དངུལ་ཀྲམ་ས་ཡ་༦་བཏང་སྟེ་ གཞི་བཙུགས་འབད་ནི་ཨིནམ་ད་ ལས་འགུལ་འདི་ ལོ་༡་གི་ནང་འཁོད་ མཇུག་བསྡུ་ཚུགས་པའི་རེ་བ་འདུག

ཀཱོ་རི་ཡ་སྔོ་ལྗངས་འཕྲུལ་རིག་ལྟེ་བའི་ ཞིབ་འཚོལ་འགོ་དཔོན་གོངམ་ དྲུག་ཨའུ་ཇཱུན་གྱིས་སླབ་མི་ནང་ ལས་འགུལ་འདི་ མཐར་འཁྱོལ་ཅན་ཅིག་སྦེ་འཐོན་པ་ཅིན་ འདི་བཟུམ་གྱི་ལྟེ་བ་ཚུ་ རྫོང་ཁག་གཞན་ཁ་ལས་ཕར་ཡང་ གཞི་བཙུགས་འབད་འོང་ཟེར་བཤད་ཅི།

འདི་བཟུམ་སྦེ་ ཕྱགས་སྙིགས་འཛིན་སྐྱོང་སྡེ་ཚན་ནང་ལས་ མཐའ་འཁོར་གཙོ་འཛིན་འགོ་དཔོན་ འཕྲིས་རྡོ་རྗེ་གིས་སླབ་མི་ནང་ ད་རེས་རྫོང་ཁག་ག་རའི་ནང་ལས་ཕར་ ཕྱགས་སྙིགས་བཀོ་སའི་ས་གོ་རེ་ཡོདཔ་ཨིན་རུང་ ས་གོ་འདི་ཚུ་གི་ནང་ལུ་ ཕྱགས་སྙིགས་ག་ལྷོད་སྦེ་ བཀོ་སའི་ས་གོ་ཅིག་ལུ་འགྱུར་ཏེ་ཡོདཔ་ལས་ ས་གོ་རེམ་གཉིསམ་འདི་ སྒོ་བསྡམས་དགོཔ་ཡང་ འཐོན་ཡོདཔ་སྦེ་ཨིན་མས།

འདི་འབདཝ་ལས་ ལྟེ་བ་འདི་ནང་ལས་ འཕྲུལ་རིག་དང་ ཁྱད་རིག་གི་རྒྱབ་སྐྱོར་ཚུ་ཐོབ་པའི་ཤུལ་ལས་ ཕྱགས་སྙིགས་བཀོག་སའི་ས་གོ་དང་ལྟེ་བ་ཚུ་གི་དོན་ལས་ ལམ་སྟོན་ཚུ་བརྩམ་འོང་ཟེར་བཤད་ཅི།

གནད་དོན་འདི་ཡང་ སྤྱི་ལོ་༢༠༡༧་ལུ་ འབྲུག་དང་ ཀོ་རི་ཡན་གཞུང་༢་ཀྱི་བར་ན་ གོ་བརྡའི་མཆིང་ཡིག་གུར་ མཚན་རྟགས་བཀོད་དེ་ཡོད་མི་དང་འཁྲིལ་ཏེ་ཨིན་མས།

འགན་ཡིག་འདི་གིས་ རྒྱལ་ཁབ་༢་ཆ་རའི་ནང་ལུ་ ནག་རླུང་ལས་བརྟེན་པའི་ གནམ་གཤིས་འགྱུར་འདྲོད་མར་ཕབ་འབད་ནི་གི་དོན་ལུ་ ཕྱགས་སྙིགས་འཛིན་སྐྱོང་འཐབ་ནི་ནང་ གཙོ་རིམ་བཟུང་ནི་སྦེ་ཡོདཔ་ཨིན་མས།

འདི་དང་གཅིག་ཁར་ མཉམ་འབྲེལ་གྲོས་སྟོན་ཞལ་འཛོམས་ཀྱི་སྐབས་ལུ་ ཐིམ་ཕུག་ཁྲོམ་དཔོན་གྱིས་ མགྱོགས་པ་རང་ ཁྲོམ་སྡེ་འདི་ནང་ལུ་ ད་རུང་རང་ ཕྱགས་སྙིགས་བསྡུ་ལེན་འབད་སའི་ལྟེ་བ་༩་གཞི་བཙུགས་འབད་ནི་སྦེ་ གསལ་ཞུ་འབད་ཡི།

འདི་ཡང་ ཁྲོམ་འདི་ནང་ ཕྱགས་སྙིགས་ཕྱི་སེལ་རྐྱབ་སྟེ་ ཕྱགས་སྙིགས་འཛིན་སྐྱོང་གི་གནས་ཚད་ ཡར་དྲག་བཏང་ཐབས་ལུ་དམིགས་ཏེ་ཨིན་མས།