| རྫོང་ཁ། | ཨིང་ལིཤ། | གཟའ་ཕུར་བུ། ༢༠༡༡ ཟླ་༤ པའི་སྤྱི་ཚེས་༢༡ |
༉ ཁ་ཙ་ རྒྱལ་ཡོངས་ཚོགས་འདུའི་དྲི་བཀོད་ལས་རིམ་ནང་ལུ་ ཞབས་ཏོག་བློན་པོ་ རྡོ་རྗེ་ཚེ་རིང་གིས་ ཤར་ཕྱོགས་དང་ནུབ་ཕྱོགས་ཀྱི་གཞུང་ལམ་ རྒྱ་སྐྱེད་ཀྱི་ལཱ་འདི་ ཡུདཔ་ཅིག་བརྒྱ་ཆ་༩༦ དེ་ཅིག་རང་ མཇུག་བསྡུ་སྟེ་ཡོདཔ་སྦེ་ གསལ་ཞུ་ཕུལ་ཡི།
༉ ལོ་བསྟར་ཞིན་དུ་ རྒྱལ་ཁབ་ནང་ལུ་ བལྟ་བཤལཔ་བརྒྱ་ལས་བཅད་དེ་འོང་དོ་ཡོད་ས་ལས་ དམིགས་གསལ་ རྒྱ་གར་ལས་ ལུང་ཕྱོགས་ཀྱི་བལྟ་བཤལཔ་ འོང་མི་གི་གྱངས་ཁ་འདི་ ཡར་སེང་སོང་སྟེ་སྦེ་འདུག
དེ་སྦེ་ བལྟ་བཤལ་གོང་འཕེལ་འགྱོ་མི་དང་ ཁྲལ་དགོངས་ཡངས་ལུ་བརྟེན་ཏེ་ ད་རེས་ནངས་པ་ མི་མང་ཤོས་ཅིག་གིས་རང་ བལྟ་བཤལ་གྱི་དོན་ལས་ བཟའ་ཁང་ ལེ་ཤ་ཅིག་གིས་རང་རྐྱབ་ཡོདཔ་མ་ཚད་ ད་རུང་ བཟའ་ཁང་བརྒྱ་ལས་བཅད་དེ་ བརྐྱབ་པའི་བསྒང་རང་ཡོདཔ་ཨིན་མས།
༉ སྤུ་ན་ཁ་ འཛོམས་མི་རྒེད་འོག་ མེ་མདའ་སྒང་སྤྱི་འོག་གི་ མི་སེར་སོ་ནམ་པ་ཚུ་གིས་ ད་རེས་ནངས་པ་ ཡོངས་གྲགས་ལུ་ ཤར་སྦི་གོན་ཅུ་ཟེར་མི་འདི་བཙོང་སྟེ་སྦེ་ འོང་འབབ་བཟོ་བའི་བསྒང་རང་འདུག
གཡུས་འདི་ནང་གི་མི་ཚུ་གིས་ གོན་འདི་ཡང་ རང་ཟླ་༡༢ པའི་ནང་ལུ་བཙུགས་ཏེ་ རང་ཟླ་༣ པ་དང་༤ དེ་ཅིག་ནང་ལས་ བཙོང་ནི་འགོ་བཙུགས་དོ་ཡོདཔ་ད་ མི་ཚུ་གིས་སླབ་མི་ནང་ གོན་གྱི་ལཱ་འདི་ དཀའཝ་དེ་ཅིག་རང་སྤྱད་དེ་ ལཱ་འབད་མ་དགོ་པའི་ཁར་ ཚོང་འབྲེལ་འདི་ ཁེབ་ས་ལེགས་ཤོམ་སྦེ་བཟོ་ཚུགས་པས་ཟེར་ཨིན་མས།
༉ རྒྱལ་ཡོངས་ཚོགས་སྡེའི་ དམིགས་བསལ་ཚོགས་ཆུང་གིས་ འཕྲུལ་རིག་དང་ལག་རྩལ་ཤེས་ཡོན་གྱི་ཐད་ཁར་ གཞུང་སྐྱོང་གི་བཟོ་བཀོད་འདི་ ལེགས་སྒྱུར་འབད་དགོ་པའི་སྐོར་ལས་ རྒྱབ་སྣོན་འབད་དེ་འདུག
ཚོགས་ཆུང་འདི་གིས་ འཕྲུལ་རིག་དང་ལག་རྩལ་ཤེས་ཡོན་གྱི་ཐད་ཁར་ ཁོང་རའི་མཐའ་དཔྱད་ཀྱི་བསྐྱར་ཞིབ་སྙན་ཞུ་འདི་ ད་རེས་ གསལ་ཞུ་ཕུལ་ཏེ་ཡོདཔ་ཨིན།
༉ རྒྱལ་ཁབ་ཀྱི་ས་གནས་མཐའ་ཟུར་ལས་ཕར་སྡོད་མི་ འབྲུག་པའི་མི་སེར་ཚུ་གིས་ ད་ལས་ཕར་ ཁྱིམ་རྐྱབ་ནི་གི་དོན་ལུ་ གོང་ཚད་ཕབ་ཆ་ཡོད་པའི་ གྲོང་གསེབ་ཤིང་ཆས་ཀྱི་དོན་ལུ་ ཞུ་བ་ཕུལ་ཚུགས་ནི་ཨིན་མས།
འདི་ཡང་ རྒྱལ་ཡོངས་ཚོགས་འདུའི་ གཞུང་སྐྱོང་ལེགས་ལྡན་ཚོགས་ཆུང་གིས་ རྒྱབ་སྣོན་ཁག་༡༠འབད་དེ་ཡོད་མི་འདི་ ཆ་འཇོག་འབད་ནི་འདི་གིས་ཨིན་མས།
༉ བློན་ཆེན་ ཌོག་ཊར་བློ་གྲོ་ཚེ་རིང་གིས་ གཞུང་ལུ་ གོ་ཧཱ་ཊི་ལས་ ཡོན་ཕུག་ལ་དང་ བུམ་ཐང་ དེ་ལས་ དགེ་ལེགས་ཕུག་གི་ནང་འཁོད་གནམ་གྲུ་ཐང་ནང་ལུ་ མཁའ་འགྲུལ་གྱི་ཞབས་ཏོག་ཚུ་ འགོ་མ་བཙུགས་གེ་ཟེར་ གྲོས་འཆར་ཕུལ་ཡི།
༉ གཞལ་སྒང་གི་ ལྕམ་མཁར་ཆུ་གློག་མེ་ལས་འགུལ་མེ་ག་ཝཊི་༧༧༠འབད་མི་འདི་ ལོ་༥འཆར་གཞི་༡༢པའི་ནང་ལུ་མི་རྐྱབ་ནི་སྦེ་ ཐག་བཏོག་ནི་འདི་གིས་ རྫོང་ཁག་འདི་ནང་གི་མི་སེར་ཚུ་ལུ་ རེ་བ་དང་རེ་ཆི་ཚུ་ རྫོགས་ཏེ་འདུག
འཕངས་མཁར་རྒེད་འོག་ནང་ལུ་ཡོད་པའི་ སྤན་ལྟང་གཡུས་ཁའི་མི་སེར་ཚུ་གིས་ དཔལ་འབྱོར་ཡར་དྲག་གི་གོ་སྐབས་ཚུ་མཐོང་མི་དང་འབྲེལ་ དངུལ་ཁང་ནང་ལས་ སྐྱིན་འགྲུལ་ཚུ་ལེན་ཞིན་ན་ ཁྱིམ་དང་ཚོང་ཁང་ཚུ་ རྐྱབ་ནི་འགོ་བཙུགས་ནུག
འདི་བཟུམ་སྦེ་ ཁེངས་སྟོད་ཀྱི་ རྒེད་འོག་༣གྱི་ཁྱིམ་གུང་པ་༣༤གིས་ ཟུར་ལམ་ཅིག་ གློག་མེ་འཕྲུལ་ཁང་གི་ས་སྒོ་ཚུན་ཚོད་ སེལ་འོང་ཟེར་མནོ་ ཁོང་རའི་ས་ཆ་ཚུ་ཡང་ ལམ་སེལ་ནི་གི་དོན་ལུ་བྱིན་ཡོདཔ་མ་ཚད་ འཕྲལ་ཁམས་གཅིག་ཁར་ ས་གནས་རིན་སྡི་སྒང་ལུ་སྦེ་ མང་སྡེ་ཆུ་གུ་ལས་ སྤིང་ཟམ་ཅིག་ཡང་ རྐྱབ་སྟེ་འདུག
སྤན་ལྟང་གཡུས་ཚན་གྱི་མ་ཚད་པར་ པཱན་སྦང་དང་འདི་ག་ལ་ དེ་ལས་ ཏིང་ཏིང་སྦིས་གཡུས་ཚན་ཚུ་ནང་ལས་ཕར་ཡང་ ཁྱིམ་གསརཔ་ལེ་ཤ་ཅིག་རང་ རྐྱབ་པའི་བསྒང་རང་ཡོདཔ་ཨིན་མས།
༉ རྒྱལ་ཡོངས་ཚོགས་འདུ་ནང་ལུ་ ད་རིས་ གཞུང་གིས་ ལྕམ་མཁར་ཆུ་གློག་མེ་ལས་འགུལ་འདི་ བཟོ་བསྐྲུན་མི་འབད་ནི་སྦེ་ གསལ་ཞུ་ཕུལ་ཡི།
༉ རྒྱལ་ཡོངས་ཚོགས་འདུ་གིས་ སྤྱི་ཚོགས་གསུམ་པའི་ཚོགས་ཐེངས་དང་པའི་སྐབས་ལུ་ ལུང་ཕྱོགས་བལྟ་བཤལཔ་གི་དོན་ལས་ འཛུལ་སྒོ་༥བཟོ་ནི་སྦེ་ ཆ་འཇོག་གནང་སྟེ་ཡོད་མི་འདི་ ལག་ལེན་འཐབ་པ་ལུ་ དུས་ཡུན་ཨ་ཙི་འགོར་ནི་ཨིན་མས།
པདྨ་དགའ་ཚལ་ གདུང་སྨད་རྒེད་འོག་གི་ གསེར་བསྡུ་བ་སྤྱི་འོག་ནང་ལུ་ མི་སེར་ཚུ་གིས་ ཕྲལ་ཁམས་ཅིག་ཁར་ སོ་ནམ་ཞིང་ལམ་བསལ་ནི་འགོ་བཙུགས་ཏེ་ཡོདཔ་ལས་ སྤྱི་འོག་འདི་ནང་གི་མི་སེར་ཚུ་གིས་ ཧེ་མ་བཟུམ་སྦེ་ དཀའཝ་སྤྱོད་མི་དགོ་ནི་ཨིནམ་མ་ཚད་ སོ་ནམ་གྱི་ཐོན་སྐྱེད་ཚུ་ཡང་ ཚོང་འབྲེལ་འཐབ་ནི་ནང་ སྟབས་བདེ་ཏོག་ཏོ་འགྱོ་ནི་ཨིན་མས།